Zgjedhjet e mesmandatit në SHBA: Tre kandidatë me origjinë shqiptare fitojnë mandatin

Në zgjedhjet e mesmandatit të mbajtura në Shtetet e Bashkuara të Amerikës, tetë kandidatë me prejardhje shqiptare garuan për poste në nivel lokal, shtetëror dhe federal, ku sipas rezultateve paraprake të publikuara tre prej tyre dolën fitues kurse pesë të tjerë nuk arritën të siguronin fitoren. Joe Hoxha, republikan i lindur në Tiranë, fitoi garën për Dhomën e Përfaqësuesve të Connecticut-it në Distriktin e 78-të duke siguruar mandatin e tretë, ndërsa Vedat Gashi dhe Emiljana Ulaj fituan në qarkun Westchester të Nju Jorkut. Gara më e ngushtë ishte ajo e Joe Hoxhës, i cili mori 4,585 vota ose 50.91 për qind, ndërsa kundërkandidati demokrat Nate Brown siguroi 4,421 vota ose 49.09 për qind, me një diferencë prej vetëm 164 votash, ndërsa rezultati mbetet në pritje të certifikimit zyrtar, siç bëjnë të ditur të dhënat paraprake të publikuara deri më 6 nëntor.

Në Nju Jork, Vedat Gashi, demokrat i lindur në Kosovë, fitoi garën për legjislaturën e Westchester County në Distriktin e 4-t, duke marrë 16,142 vota ose 60.70 për qind, përballë kundërshtarit republikan John J. Campobasso i cili siguroi 10,435 vota ose 39.24 për qind, sipas përditësimit të rezultateve paraprake të publikuara nga autoritetet zgjedhore të qarkut. Fitoren e siguroi edhe Emiljana Ulaj, demokrate me prejardhje shqiptare, e cila garoi për legjislaturën e të njëjtit qark në Distriktin e 9-të, duke siguruar 14,560 vota ose 71.69 për qind, kundrejt 5,718 votave ose 28.15 për qind të republikanit Gaetano V. Ventrone.

Pesë kandidatë të tjerë me origjinë shqiptare nuk arritën të fitonin mandatet në garat e tyre përkatëse. Diamant Hysenaj, republikan me prejardhje nga Kosova, garoi për një vend në Kongresin amerikan në Distriktin e 14-të të Nju Jorkut përballë demokrates Alexandria Ocasio-Cortez, ku mori 29,505 vota ose 20.97 për qind, ndërsa kundërshtarja e tij siguroi 107,129 vota ose 76.14 për qind. Në të njëjtin shtet, Shpëtim Qorraj, demokrat me prejardhje nga Kosova, nuk arriti të fitonte në Asamblenë e Shtetit të Nju Jorkut në Distriktin e 64-t, duke marrë 14,276 vota ose 38.60 për qind përballë republikanit Michael Tannousis që siguroi 21,972 vota ose 59.41 për qind, sipas Bordit Zgjedhor të New York-ut. Në Connecticut, Peter Lumaj, republikan i lindur në Shqipëri, humbi garën për postin e sekretarit të shtetit përballë demokrates Stephanie Thomas, e cila mori 801,397 vota ose 63.3 për qind, ndërsa Lumaj siguroi 464,856 vota ose 36.7 për qind me rreth 98.2 për qind të votave të pritshme të numëruara, sipas rezultateve të publikuara nga NBC Connecticut. Po në Connecticut, Alma Sarelli, republikane me origjinë nga Shkodra, mori 15,114 vota ose 34.6 për qind në garën për Senatin e Shtetit në Distriktin e 26-të, të cilën e fitoi demokratja Samantha Nestor me 28,572 vota ose 65.4 për qind. Kandidatja tjetër Edlira Sako, demokrate nga Lushnja, garoi për Senatin e Shtetit të Michiganit në Distriktin e 24-t, ku sipas rezultateve të raportuara nga Macomb County ajo siguroi 52,850 vota ose rreth 40 për qind, ndërsa republikani Douglas Wozniak mori 80,324 vota ose rreth 60 për qind.