Komisioni i përbashkët historik RMV-Bullgari përfundon pa rezultate

Komisioni i Përbashkët Multidisiplinar i Ekspertëve për Çështjet Historike dhe Arsimore mes Bullgarisë dhe Maqedonisë së Veriut ka zhvilluar takimin e fundit në Shkup, i cili ka përfunduar pa ndonjë rezultat konkret, njofton agjencia bullgare e lajmeve BTA. Gjatë këtij takimi, i cili ishte i pesti për këtë vit, përfaqësuesit nga të dyja palët nuk kanë arritur të gjejnë gjuhën e përbashkët për mënyrën e paraqitjes së Kryepeshkopatës së Ohrit në tekstet shkollore të historisë.

Pala bullgare ka përsëritur propozimin për shënimin e përbashkët të përvjetorit të vdekjes së Dame Gruevit, pasi në dhjetor të vitit 2026 bëhen njëqind e njëzet vjet nga vdekja e revolucionarit, por kjo iniciativë është pritur në heshtje nga përfaqësuesit maqedonas. Në vend të kësaj, delegacioni i Maqedonisë së Veriut ka prezantuar një tekst të përgatitur më herët për përkujtimin e përbashkët të rezistencës kundër fashizmit, antisemitizmit dhe nacional-socializmit që nisi në vitin 1941. Ky propozim është refuzuar nga delegacioni bullgar me arsyetimin se kjo rezistencë shënohet në mbarë Evropën dhe nuk duhet kufizuar në nisma dypalëshe, ndërsa puna duhet përqendruar te shekulli XI.

Në këtë takim, historianët bullgarë kanë evokuar pritshmëritë e Komisionit Evropian dhe Parlamentit Evropian për rezultate të qarta, ndërsa raporti i Komisionit Evropian thekson se nga muaji shtator i vitit 2025 deri në muajin mars të vitit 2026 janë mbajtur katër takime pa arritur rezultate konkrete. Takimi i radhës i komisionit do të organizohet në fillim të muajit dhjetor në Sofje.