Vigan Berisha takon presidentin zviceran dhe dhuron punimin e të mbijetuarave

Konsulli Vigan Berisha është takuar në Bernë me Presidentin e Konfederatës Zvicerane, Guy Parmelin, gjatë një pritjeje zyrtare, ku i ka dhuruar një vepër artistike të realizuar nga gratë e mbijetuara të dhunës seksuale gjatë luftës së fundit në Kosovë. Kjo vepër, e përgatitur në kuadër të Qendrës për Promovimin e të Drejtave të Grave, përcjell mesazhin për historinë, qëndresën, guximin dhe dinjitetin e grave, siç bëhet e ditur në njoftimin e Ambasadës së Kosovës në Zvicër.

Në kuadër të aktiviteteve diplomatike, Berisha u bashkua me kolegët e Korit Konsullor në Cyrih për të vizituar Sallën e Këshillit Kombëtar të Parlamentit Federal në Bernë. Gjatë kësaj vizite, përfaqësuesit konsullorë u njohën nga afër me organizimin, funksionimin dhe traditën parlamentare të institucioneve zvicerane, duke shfrytëzuar rastin për të forcuar bashkëpunimin brenda komunitetit diplomatik.