Berisha: Humbja e republikanëve në SHBA nga çmimet, tarifat dhe lufta me Iranin

Kreu i Partisë Demokratike, Sali Berisha, ka komentuar për herë të parë humbjen e pozicioneve të republikanëve në Kongres dhe Senat të SHBA-së. I ftuar në emisionin “Now” me Erla Mëhillin, Berisha tha se faktorët kryesorë që ndikuan në votën e amerikanëve ishin rritja e çmimeve, tarifat tregtare dhe lufta me Iranin, veçanërisht përdorimi i Ngushticës së Hormuzit si armë strategjike.

Sipas Berishës, rritja e çmimeve në SHBA u shkaktua nga dy faktorë: tarifat tregtare dhe lufta me Iranin. Ai theksoi se rezultati duhet parë në raport me shqetësimet ekonomike të qytetarëve amerikanë. I pyetur nëse ndryshimi i balancave politike mund të ndikojë në marrëdhëniet e tij me administratën amerikane, Berisha u përgjigj se nuk pret asnjë ndryshim.

Berisha foli gjithashtu për marrëdhëniet me ambasadën amerikane në Tiranë, duke pretenduar se nuk ka qenë i pranishëm në shumicën e ceremonive të mirëseardhjes për ambasadorët amerikanë që kanë shërbyer në Shqipëri. Ai tha se Partia Demokratike është e hapur për komunikim me ambasadën.