Vazhdojnë hulumtimet arkeologjike në Kalanë e Kastërcit
Hulumtimet arkeologjike në Kalanë e Kastërcit në Suharekë po vazhdojnë gjatë vitit 2026, me fokus në bazilikën paleokristiane.
SUHAREKË — Hulumtimet arkeologjike në Kalanë e Kastërcit në Suharekë po vazhdojnë edhe gjatë vitit 2026, me fokus në hapësirën e bazilikës paleokristiane dhe zonat përreth saj. Lajmin e ka bërë të ditur zëvendësministrja në detyrë e Kulturës dhe Turizmit, Nora Arapi-Krasniqi, e cila ka vizituar lokalitetin arkeologjik për të parë nga afër punimet që po zhvillohen.
Kalaja e Kastërcit konsiderohet një nga lokalitetet më të rëndësishme arkeologjike në Kosovë, me gjurmë banimi që datojnë që nga periudha eneolitike dhe dëshmi të zhvillimit të lokalitetit deri në periudhën mesjetare. Ndër zbulimet më të rëndësishme në këtë lokalitet është bazilika paleokristiane e fillimit të shekullit VI, së bashku me pagëzimoren, muret rrethuese dhe varret mesjetare të zbuluara në hapësirën e saj.
Gjatë vizitës, Arapi-Krasniqi ka theksuar rëndësinë e vazhdimit të punës për hulumtimin, mbrojtjen dhe ruajtjen e trashëgimisë arkeologjike, duke vlerësuar se investimi në këtë fushë është investim në historinë dhe kujtesën kolektive.
