Haxhiu dekreton largimin e 20 prokurorëve serbë, SHBA dhe BE reagojnë

— Ushtruesja e detyrës së Presidentes së Kosovës, Albulena Haxhiu, ka dekretuar largimin përfundimtar nga puna të 20 prokurorëve serbë të cilët ishin larguar nga vendet e tyre të punës në vitin 2022. Lidhur me këtë çështje, Ambasada e SHBA-së në Prishtinë ka thënë se Kushtetuta e Kosovës e garanton përfaqësimin e serbëve në institucionet e vendit.

Ambasada e SHBA-së thotë se presin nga Qeveria e Kosovës që të sigurojë që serbët të kenë mundësi të barabarta dhe që të kenë mundësi të marrin plotësisht pjesë në jetën politike dhe qytetare të Kosovës.

“Kushtetuta dhe ligjet e Kosovës garantojnë përfaqësimin e serbëve të Kosovës në institucionet e vendit. Ne presim që Qeveria e Kosovës të sigurojë që serbët e Kosovës të kenë mundësi të barabarta dhe të jenë në gjendje të marrin pjesë plotësisht në jetën politike dhe qytetare të Kosovës”, ka thënë një zëdhënës i Ambasadës.

Bashkimi Evropian ka shprehur shqetësim për vendimin e Këshillit Prokurorial të Kosovës dhe të U.d. Presidentes Haxhiu.

Burim: Klan Kosova

— Redaksia ZHURMA