Zjarrfikës kanadezë përfundojnë në Berat fazën e parë të trajnimeve

— BERAT, 22 korrik — Misioni kanadez "Firefighters Without Borders Canada" (Zjarrfikës pa Kufij) po zhvillon një program kombëtar trajnimesh në Shqipëri, në bashkëpunim me institucionet shqiptare të Mbrojtjes nga Zjarri dhe Shpëtimit. Ministri i Shtetit për Pushtetin Vendor, Ervin Demo, bëri të ditur përmes një postimi në rrjetet sociale, se programi synon rritjen e kapaciteteve profesionale të efektivëve zjarrfikës dhe përmirësimin e gatishmërisë për përballimin e situatave emergjente.

Ekspertët kanadezë, të udhëhequr nga Robert Dubbert, përmbyllën në Berat fazën e parë të trajnimit me efektivët e shërbimit zjarrfikës. Gjatë trajnimit u ndanë përvoja dhe praktika më të mira ndërkombëtare për ndërhyrjet në raste zjarresh, përmbytjesh, aksidentesh rrugore dhe situatash të tjera emergjente.

Pas përfundimit të kësaj faze në Berat, programi do të vijojë në bashki të tjera të vendit, duke përfshirë efektivë të shërbimeve zjarrfikëse nga disa qytete. Sipas ministrit Demo, ky bashkëpunim synon forcimin e kapaciteteve profesionale, rritjen e gatishmërisë operacionale dhe garantimin e një reagimi sa më të shpejtë dhe efikas në mbrojtje të jetës dhe sigurisë së qytetarëve.

Burim: ATSH

— Redaksia ZHURMA