Demo paralajmëron rrezik të lartë zjarresh në nëntë qarqe
IGJEUM parashikon nivel të lartë për të martën dhe të mërkurën; Shkodër, Kukës e Dibër kanë rrezik kryesisht të moderuar.
TIRANË — Ministri i Shtetit për Pushtetin Vendor, Ervin Demo, apeloi për kujdes maksimal nga qytetarët, pasi temperaturat e larta gjatë ditëve në vijim pritet të rrisin ndjeshëm rrezikun për shpërthimin dhe përhapjen e zjarreve në një pjesë të madhe të vendit. Paralajmërimi mbështetet te Instituti i Gjeoshkencave, Energjisë, Ujit dhe Mjedisit (IGJEUM).
Gjatë të martës dhe të mërkurës pritet nivel i lartë rreziku në shumicën e qarqeve. Në nivel të lartë janë Lezha, Durrësi, Tirana, Elbasani, Fieri, Berati, Korça, Vlora dhe Gjirokastra, ndërsa në Shkodër, Kukës dhe Dibër rreziku parashikohet kryesisht i moderuar, me zona që mund të arrijë gjithashtu nivel të lartë.
Demo u bëri thirrje qytetarëve të shmangin çdo veprim që mund të shkaktojë zjarr, të mos ndezin zjarre në ambiente të hapura dhe të mos hedhin bishta cigaresh në natyrë, duke raportuar menjëherë çdo vatër zjarri. "Mbrojtja e pyjeve dhe e mjedisit është përgjegjësi e përbashkët. Me kujdesin e secilit prej nesh, mund të parandalojmë zjarret dhe të mbrojmë natyrën", u shpreh ai.
Burim: ATSH
— Redaksia ZHURMA