Cilat institucione publike dështuan në auditimin e fundit të ZKA-së?

PRISHTINË — Zyra Kombëtare e Auditimit ka publikuar 19 raporte të reja auditimi të cilat zbulojnë gjendjen e menaxhimit financiar në institucionet tona. Këto auditime, pjesë e Planit Vjetor 2025/2026, përfshijnë 11 institucione qendrore, shtatë lokale dhe një auditim të veçantë. Rezultatet tregojnë se pjesa dërrmuese e tyre kanë dështuar të marrin një vlerësim të pastër financiar.

Nga institucionet e audituara, plot 12 prej tyre kanë marrë opinion të kualifikuar për pasqyrat e tyre financiare. Në këtë listë të gjatë bëjnë pjesë dikastere kyçe si Ministria e Arsimit, Ministria e Mjedisit dhe Infrastrukturës, Ministria e Industrisë, Ministria për Komunitete dhe Kthim, Korporata Energjetike e Kosovës (KEK), Universiteti i Prishtinës, si dhe gjashtë komuna të vendit.

Komunat që morën opinion të kualifikuar janë Klina, Podujeva, Prizreni, Skenderaj, Peja dhe Ferizaj. Në anën tjetër, vetëm shtatë institucione arritën të marrin opinion të pamodifikuar. Ndër to radhiten Gjykata Kushtetuese, Ministria e Punëve të Jashtme, Ministria e Mbrojtjes, Ministria e Drejtësisë, Autoriteti Rregullativ i Hekurudhave dhe Komuna e Mitrovicës Veriore, duke treguar disiplinë më të lartë financiare.

Përtej pasqyrave financiare, ZKA ka vlerësuar edhe pajtueshmërinë e aktiviteteve dhe operacioneve me ligjin, ku 14 institucione kanë pranuar konkluzion të kualifikuar. Kjo do të thotë se disa nga veprimet e tyre nuk ishin në përputhje me kornizën ligjore në fuqi. Vetëm Kushtetuesja, Ministria për Kthim, Autoriteti i Hekurudhave dhe Mitrovica Veriore morën konkluzion të pakualifikuar.

Në total, auditori ka adresuar 173 rekomandime me qëllim përmirësimin e menaxhimit të parave publike dhe shërbimeve ndaj qytetarëve. Deri tani, ky institucion ka publikuar gjithsej 57 raporte auditimi për këtë cikël, përfshirë 54 të rregullsisë, një të performancës dhe dy të veçanta. Procesi i publikimit të raporteve do të vijojë deri më 30 qershor 2026.

Ky numër i madh i opinioneve të kualifikuara dëshmon se menaxhimi i financave në nivelin qendror dhe lokal mbetet një sfidë serioze dhe me shkelje të vazhdueshme ligjore.

Burim: Ekonomia Online
— Redaksia ZHURMA