Ahmeti: Kryeministër, kushdo që po të këshillon për ekonomi po ta bën gropën

Ish-kryetari i Prishtinës, Shpend Ahmeti, ka kritikuar politikat ekonomike të Qeverisë së Kosovës, duke vlerësuar se rritja e pagave, pensioneve dhe shtesave për fëmijë nuk mund të ndahet nga rritja e çmimeve dhe vështirësitë e qytetarëve me koston e jetesës. Sipas tij, Kosova po përballet me një nivel të lartë të inflacionit dhe me çmime të larta, ndonëse përdor euron si valutë, transmetojnë platformat e ndryshme mediatike.

Ahmeti ka argumentuar se politikat e brendshme dhe mungesa e investimeve kapitale në prodhim po ndikojnë në rritjen e të hyrave të shtetit përmes tatimit mbi vlerën e shtuar, ndërsa qytetarët detyrohen të përdorin kursimet e tyre. Ai ka theksuar se buxhetimi i deritanishëm po shpenzohet kryesisht për ndihma sociale, shtesa dhe rritje pagash në sektorin publik, pa krijuar prodhim vendor dhe pasuri të re brenda vendit.

«Kryeministër, kushdo që po të këshillon për ekonomi, ose nuk po din, ose po ta bën gropën. Por bashkë me vete, po na bën gropen edhe krejt Kosovës», ka shkruar ai, duke bërë thirrje për orientim drejt projekteve kapitale dhe krijimit të vlerës ekonomike.