Virozat e vjeshtës më aggressive, prekën më tepër moshat në punë

Temperaturat e larta, të pazakontshme për vjeshtë, po ndihmojnë përhapjen e virozave që këtë vit shfaqen me simptoma më të forta krahasuar me vitin e kaluar. Mjeku P. Male tregon se temperatura e lartë është simptomë kryesore, ndërkohë rastet paraqiten edhe me dhimbje kockash, diarre dhe vjella.

Mjekët raportojnë edhe raste gastroenteriti, ndërsa disa viroza kanë prekur mushkëritë duke kërkuar trajtim me antibiotike. Më të prekura janë moshat e mesme dhe të reja që punojnë, duke shkaktuar mungesa të shumta në institucione. Përhapja është më e lartë midis personave që punojnë në zyra dhe mjedise me grumbullim njerëzish. Personat në moshë më të madhe e kalojnë virozën me simptoma më të lehta.

Vlora dhe Saranda kanë incidencën më të lartë të rasteve me diarre, e lidhur me fluksin e lartë turistik dhe grumbullimet e mëdha gjatë verës.