Pacolli: Gjobitet KRM “Ambienti” për parregullsitë në deponinë e Sferkës

Inspektorati i Mjedisit ka ndërmarrë masë ndëshkimore ndaj Kompanisë Rajonale të Mbeturinave «Ambienti» në Pejë, duke e gjobitur atë me 3 mijë euro për shkak të parregullsive në menaxhimin e deponisë së mbeturinave në Sferkë, sipas njoftimit të ministres Fitore Pacolli.

Gjatë inspektimit në terren, autoritetet kanë evidentuar grumbullimin e mbeturinave pa shtresim të rregullt me dhe, tejmbushjen e lagunës për grumbullimin e ujërave të ndotura, si dhe mungesën e mirëmbajtjes dhe të kontrollit të sistemit të kullimit.

Duke theksuar rëndësinë e zbatimit të rregullave për mbrojtjen e ekosistemit, ministrja Pacolli u shpreh se «mbrojtja e mjedisit dhe e ujërave nëntokësore është obligim ligjor që duhet të zbatohet nga të gjithë, pa përjashtim».

Kujtojmë se e njëjta deponi ishte përfshirë nga një zjarr masiv javë më parë, shuarja e të cilit pati marrë disa ditë kohë.