Si zbuloi dëshmia e moldavianes rrjetin e trafikimit në Mal të Zi?

PODGORICË — Svetllana Çabotarenko, shtetase moldave e trafikuar, i tregoi policisë në Mal të Zi se ishte detyruar të prostituohej dhe ishte shitur disa herë. Në dëshminë e saj, ajo emëroi bashkëpunëtorë me ndikim, përfshirë ish-zëvendëskryeprokurorin e shtetit, Zoran Piperoviq — dëshmi që nxiti arrestime dhe hetimin ndaj rrjetit të trafikimit.

Ajo kishte mbërritur në Republikën e atëhershme Federale të Jugosllavisë në vitin 1998, në një grup prej 40 personash, me premtimin se do të mblidhnin misër e do të punonin në vreshta pranë Novi Sadit. Por njeriu që i kishte siguruar vizën kishte plane të tjera: e vuri të punonte në një kafene.

Ai ia mori pasaportën dhe që atëherë e shiti vazhdimisht, pa mundësi që ajo të bënte diçka. Nga Serbia, Çabotarenko u dërgua në Zvornik të Bosnjës e Hercegovinës, ku u shit sërish dhe përfundoi në spital me krahun e thyer dhe brinjë të thyera.

Nga Zvorniku, Çabotarenko u shit edhe një herë dhe përfundoi në Podgoricë të Malit të Zi. Në fillim të viteve 2000, shfrytëzimi seksual i grave moldave jashtë vendit arriti kulmin, thotë Ina Buimestru, nga organizata La Strada Moldova. Vetë

Sipas saj, në 99 për qind të rasteve bëhej fjalë për gra të shfrytëzuara seksualisht jashtë vendit, kryesisht në Ballkanin Perëndimor dhe në Turqi. Disa vite pasi mbërriti në Podgoricë, Çabotarenko iu drejtua policisë duke pretenduar se ishte detyruar të prostituohej, ishte shitur disa herë dhe ishte dhunuar seksualisht.

Pak ditë më vonë, policia arrestoi disa persona, mes tyre edhe Zoran Piperoviqin. Sipas Tea Gorjanc Prelleviqit, nga Aksioni për të Drejtat e Njeriut, Çabotarenko kishte deklaruar se ishte pikërisht Piperoviq ai që e kishte sjellë nga Republika Sërpska në Mal të Zi, pa dokumente identiteti dhe e fshehur në makinë.

Përveç Piperoviqit, të dyshuar për ndërmjetësim në prostitucion ishin edhe biznesmeni Ekrem Jasaviq, pronari i një restoranti, Bajram Orahovac, dhe Irfan Kurpejoviq. Rreth 50 dëshmitarë u pyetën gjatë hetimit, ndërsa Çabotarenko dha një dëshmi prej mbi 200 faqesh, duke treguar hollësisht vendet ku ishte keqtrajtuar dhe duke fituar statusin e dëshmitares së mbrojtur.

Burim: Kallxo
— Redaksia ZHURMA