Policia e Kosovës regjistron 10 raste të reja të dhunës në familje në 24 orët e fundit

Policia e Kosovës ka njoftuar se ka regjistruar dhjetë raste të reja të dhunës në familje në 24 orët e fundit në disa rajone të vendit. Tri raste janë shënuar në Gjakovë, dy në Prishtinë dhe nga një rast në Fushë-Kosovë, Ferizaj, Rahovec, Vushtrri dhe Zubin-Potok.

Më parë ishte raportuar për 11 raste të tjera të dhunës familjare në disa komuna, ndërsa organet e rendit vazhdojnë të pranojnë raportime të shumta ku në shumicën prej tyre viktima janë gratë.

Në Vushtrri, Policia ka arrestuar një burrë pasi ai kishte sulmuar fizikisht bashkëshorten e tij. Nga i njëjti person, zyrtarët policorë kanë sekuestruar dy pistoleta, një pushkë ajrore si dhe 7 copë fishekë, ndërsa me vendim të prokurorit i dyshuari është dërguar në mbajtje.

Në dy raste të ndryshme, kanosjet kanë ardhur nga persona që ndodhen jashtë vendit. Në Gjakovë, një nënë ka kërkuar urdhër mbrojtës pasi ka pranuar mesazhe kërcënuese nga djali i saj që jeton jashtë Kosovës, duke bërë që i dyshuari të shpallet në kërkim policor. Po ashtu, në Prishtinë, një grua dhe familjarët e saj kanë marrë mesazhe kërcënuese përmes rrjeteve sociale nga ish-bashkëshorti i saj që jeton jashtë vendit. Viktima në Prishtinë ka kërkuar po ashtu urdhër mbrojtës dhe prokurori është njoftuar për rastin.

Në rastin tjetër në Prishtinë, një i dyshuar është arrestuar dhe dërguar në mbajtje me vendim të prokurorit pasi ka sulmuar fizikisht të dashurën e tij pas një mosmarrëveshjeje, me ç'rast viktima ka marrë tretman mjekësor. Në Gjakovë janë raportuar edhe dy raste të tjera: në njërin një burrë është dërguar në mbajtje sepse ka sulmuar fizikisht vëllain e tij, ndërsa në rastin tjetër një i dyshuari i ka shkaktuar dhunë psikike të dashurës së tij për shkaqe xhelozie, duke bërë që viktima të kthehet te familja e saj me dëshirën e vet derisa i dyshuari mbetet në arrati.

Dhuna fizike dhe psikike është raportuar edhe në rajone të tjera. Në Rahovec, një burrë është arrestuar dhe dërguar në mbajtje sepse ka sulmuar fizikisht babanë e tij, ku të dyja palët kanë marrë tretman mjekësor. Në Fushë-Kosovë, një babai i ka shkaktuar dhunë psikike djali i tij, rast ky që po hetohet në procedurë të rregullt në konsultim me prokurorin. Në Ferizaj, një grua është sulmuar fizikisht nga bashkëjetuesi i saj i cili gjendet në arrati. Ndërkaq në Zubin-Potok, Policia ka arrestuar një person pas raportimit se ai kishte fyer dhe kanosur ish-bashkëshorten e tij përmes rrjeteve sociale.

Në lidhje me të gjitha rastet e raportuara, Policia e Kosovës ka njoftuar prokurorët kujdestarë për të vazhduar me hetimet dhe procedurat përkatëse ligjore.