Çfarë trajton monografia e re e Trieshit?

ULQIN — Gazetari, publicisti dhe studiuesi Gjekë Gjon Gjonaj ka botuar librin "Trieshi – trashëgimia dhe tradita", një studim monografik etnokulturor kushtuar Trieshit, zonës së tij të lindjes në Malësinë e Madhe. Vepra, botuar nga SHAI "Art Club" në Ulqin, e ndan materialin në dhjetë kapituj që trajtojnë prejardhjen, vendbanimet, fiset dhe popullatën e kësaj treve etnogjeografike shqiptare.

Në kapitujt e tjerë, Gjonaj trajton ushqimet popullore, arkitekturën popullore, virtytet etnopsikologjike, traditat dhe zakonet, folklorin, bestytnitë, objektet arsimore e fetare, trashëgiminë natyrore dhe toponiminë e Trieshit.

Siç shprehet Gjonaj në hyrjen e librit, "ky libër nuk lindi thjesht si rezultat i një pune kërkimore apo si një projekt akademik formal, por si një thirrje e brendshme dhe morale për të mos lejuar që kujtesa historike dhe kulturore e Trieshit të zbehet me kalimin e kohës". Puna vjen kështu edhe si shlyerje e një "borxhi" moral ndaj vendlindjes.

Në parathënie, redaktori i librit, Prof. dr. Anton Nikë-Berisha, shkruan se dëshmitë që sjell Gjonaj për trashëgiminë e pasur dhe të lashtë të malësorëve të Trieshit e bëjnë studimin "të një rëndësie të shumëfishtë". Recensenti Prof. dr. Hajrullah Koliqi e vlerëson veprën si "një studim monografik i mirëfilltë për zonën e Trieshit, ku pulson zemra e autorit, e këtij intelektuali humanist dhe atdhetar, me dinjitet dhe integritet shembullor".

Libri u botua nga Shoqata e Artistëve dhe Intelektualëve "Art Club" (SHAI), me mbështetjen e Agron Dedivanajt dhe Gjokë Gjolajt, dy bashkatdhetarëve tanë nga Trieshi me banim në SHBA. Ai u shtyp në shtypshkronjën IVPE–Cetinë, ndërsa redaktimin teknik të librit e bëri Gazmend Çitaku.

Gjekë Gjon Gjonaj është autor i dhjetë librave dhe ka përkthyer katër vepra në gjuhën shqipe dhe malazeze. Ai ka kontribuuar edhe si redaktor, recensent dhe korrektor i disa botimeve të autorëve shqiptarë, dhe bashkëpunon me media dhe portale shqiptare në Mal të Zi, Shqipëri, Kosovë dhe diasporë.

Burim: Koha Javore
— Redaksia ZHURMA