Masa e ftohtë ajrore përfshin Ballkanin, ulen temperaturat

PRISHTINË — Meteorologia Anira Gjoni njoftoi, në një lidhje për emisionin "Ora Shtatë" në Klan Kosova, se i gjithë Ballkani ndodhet nën ndikimin e një mase të ftohtë ajrore me origjinë nga lindja dhe veriu. Masa, e ftohtë dhe e lagësht, po sjell rënie të temperaturave dhe reshje shiu në rajon gjatë ditës së sotme dhe të nesërme.

Sipas meteorologes, të enjten pritet përmirësim i motit, por kushtet e paqëndrueshme do të rikthehen sërish të premten. Ajo tha se temperaturat do të zbresin nën mesatare për këtë periudhë të vitit.

Gjoni theksoi se situata nuk është e pazakontë, ndonëse korriku zakonisht shoqërohet me valë të nxehti. "Nuk mund të flasim se ka diçka anormale. Herë pas here është vënë re kalimi i masave të ftohta," tha ajo, duke shtuar se ndodhemi nën ndikimin e sistemeve që sjellin këto masa të ftohta.

Ndërkohë, pjesa tjetër e Evropës, si Spanja, do të goditet nga një masë e nxehtë — një kontrast që tregon sesi Ballkani po kalon nën një sistem krejt të kundërt me pjesën tjetër të kontinentit.

Burim: Klan Kosova
— Redaksia ZHURMA