Zjarri i Sferkës: komuna dhe qeveria ia hedhin fajin njëra-tjetrës
Rehabilitimi i deponisë ishte planifikuar për janar–qershor 2026 — kush e mban përgjegjësinë që nuk u zbatua?
PEJË — Niveli lokal dhe ai qendror po i hedhin fajin njëri-tjetrit për zjarrin e vazhdueshëm në deponinë e mbeturinave në Sferkë të Pejës, problem që zgjat mbi dy dekada. Askush nuk po merr përgjegjësi, ndërsa banorët e fshatrave të Pejës dhe Klinës vuajnë pasojat në shëndet.
Mbrëmjen e së hënës situata u përshkallëzua sërish: një person u dërgua për trajtim mjekësor në Spitalin Rajonal të Pejës, ndërsa disa të tjerë morën ndihmë mjekësore në vendngjarje. Po atë mbrëmje, banorët mbajtën protesta, duke shprehur shqetësim për tymin dhe erën e rëndë që u vështirëson jetën e përditshme.
Ndërmarrja Publike “Ambienti” ka njoftuar se ka angazhuar një operator ekonomik për mbulimin e vatrave të zjarrit, ndërsa Komuna e Pejës ka premtuar stabilizimin e situatës në ditët në vijim. Për menaxhimin e situatës janë angazhuar Policia e Kosovës, ekipet emergjente dhe zjarrfikësit.
Ministrja në detyrë e Mjedisit, Fitore Pacolli, iu përgjigj ashpër Hykmete Bajramit, deputetes së zgjedhur të LDK-së, pas deklaratave të saj për gjendjen në deponi. Në një postim, Pacolli tha se Bajrami është “bashkëpunëtore e ngushtë” me Gazmend Muhaxherin, personin që, sipas saj, ka përgjegjësi për menaxhimin e deponisë.
Bajrami iu përgjigj, duke thënë se kallëzimi i saj penal nuk synon një institucion të vetëm, por të gjitha institucionet me përgjegjësi për menaxhimin e situatës. Ajo akuzoi ministren për reagim nervoz dhe tha se institucionet kanë dështuar të ndërmarrin masa konkrete për parandalimin e ndotjes.
Bajrami kujtoi se pushteti aktual vazhdon prej gjashtë vjetësh dhe se, sipas dokumentit publik të KMDK-së, rehabilitimi i plotë i deponisë së Sferkës ishte paraparë për janar-qershor 2026 — diçka që, tha ajo, nuk është realizuar.
Prokuroria Themelore në Pejë ka autorizuar një ekspert të zjarreve për të përcaktuar shkaqet e zjarrit, ndërsa Prokurori i Shtetit kërkoi angazhimin e ekipeve shtesë të zjarrfikësve. Në mes të akuzave të ndërsjella, deponia e Sferkës mbetet problemi që askush s'pranon ta zgjidhë.
Burim: Gazeta Metro
— Redaksia ZHURMA