Shqipëria kalon 1 milion mjete rrugore — 361 autovetura për 1 000 banorë
INSTAT: Mbi 1 milion mjete rrugore të regjistruara, rriten me 91% autoveturat elektrike
TIRANË — 21 korrik — Numri i mjeteve rrugore të regjistruara në Shqipëri arriti në 1 048 092 mjete në fund të vitit 2025, duke shënuar një rritje prej 9,3% krahasuar me vitin 2024, sipas të dhënave të publikuara nga INSTAT. Autoveturat vijojnë të dominojnë strukturën e mjeteve rrugore, duke përbërë 80,8% të totalit. Numri i autoveturave për 1 000 banorë është rritur në 361, nga 326 që ishte në vitin 2024.
Qarku i Tiranës ka numrin më të lartë të mjeteve rrugore në vend, me 34,7% të totalit, i ndjekur nga Durrësi me 13,6% dhe Fieri me 9,1%. Ndërkohë, qarku i Durrësit regjistron nivelin më të lartë të motorizimit, me 535 autovetura për 1 000 banorë.
Për sa i përket karakteristikave teknike, mjetet me kambio manuale përbëjnë 55,9% të totalit të mjeteve rrugore, ndërsa automjetet e prodhuara gjatë periudhës 2000–2010 përbëjnë 55,3% të flotës. INSTAT bën të ditur se autoveturat me moshë 11–20 vjet përbëjnë 45,7% të numrit total në vend.
Marka më e përdorur është Volkswagen me 19,7% të totalit, e ndjekur nga Mercedes‑Benz me 18,1%. Nafta mbetet lënda djegëse kryesore, duke zënë 72,1% të totalit në 2025. Numri i autoveturave elektrike është rritur me 91,2% krahasuar me vitin 2024.
Burim: ATSH
— Redaksia ZHURMA