Rama konfirmon koalicionin me PDK-në, premton mbështetje për LDK-në

PRISHTINË — Kryetari i Prishtinës, Përparim Rama, ka dalë me reagim pas ndryshimeve të fundit politike në komunën e kryeqytetit dhe riformatimit të koalicionit qeverisës.

Rama ka konfirmuar se do të qeverisë Prishtinën në bashkëqeverisje me Partinë Demokratike të Kosovës (PDK) dhe disa parti të tjera — pak pasi Lidhja Demokratike e Kosovës (LDK), me të cilën ai fitoi mandatet, mohoi publikisht ekzistencën e një koalicioni me PDK-në.

Në reagimin e tij, Rama shkroi se "qytetarët nuk jetojnë në parti, jetojnë në komunitet të përbashkët, prandaj ata janë përgjegjësi e PËRBASHKËT". Ai shtoi se Prishtina ndodhet "para një momenti të rëndësishëm historik dhe zhvillimor", duke përmendur përgatitjet për Lojërat Mesdhetare si shembull të projekteve madhore në vijim.

Lidhur me emërimet, Rama sqaroi se ato nga LDK-ja janë bërë "konfirm propozimeve të ardhura nga 'Kolegjiumi' i përbërë nga pesë degët e Prishtinës" — mekanizëm të cilin ai e cilëson si të themeluar nga vetë LDK-ja. Njëkohësisht, janë emëruar përfaqësues nga partnerët e koalicionit: Aleanca për Ardhmërinë e Kosovës (AAK), Nisma Socialdemokrate, Lidhja për Prishtinën dhe PDK-ja.

Rama u shpreh kundër retorikës përçarëse, duke shkruar: "Jam kundër çdo retorike përçarëse. Ne jemi një POPULL. Një SHTET." Ai e quajti bashkëqeverisjen "qasje gjithëpërfshirëse dhe funksionale" dhe nënvizoi se pushteti është "shërbim, e jo instrument bllokimi".

Në fund, Rama tha se në këto zgjedhje do ta përkrahë LDK-në siç ka bërë në të kaluarën.

Burim: Tetova Sot
— Redaksia ZHURMA