Osmani thirrje diasporës: Ejani dhe votoni më 7 qershor

PRISHTINË — Ish-presidentja e Kosovës, Vjosa Osmani, i është drejtuar diasporës më 6 maj përmes një video-mesazhi, duke i bërë thirrje mërgimtarëve të marrin pjesë në zgjedhjet e jashtëzakonshme të 7 qershorit. Ajo i fton ata të vijnë në Kosovë për të votuar ose të regjistrohen për të marrë pjesë në procesin zgjedhor, duke theksuar rolin e rëndësishëm që diaspora ka pasur gjithmonë për vendin.

Osmani theksoi se mërgata ka qenë gjithmonë pranë vendit në momentet më të rëndësishme. "E keni dëshmuar në të kaluarën, e po e dëshmoni edhe sot – ju asnjëherë nuk e latë Kosovën vet. Edhe tani, atdheu ka nevojë për ju, për fjalën tuaj, për përkushtimin tuaj dhe për pjesëmarrjen tuaj. Më 7 qershor ju duam përsëri bashkë. Ejani në Kosovë ose regjistrohuni për të votuar", tha Osmani.

Ish-presidentja tha se gjatë pesë viteve të saj në Presidencë, takimet me mërgatën kanë qenë ndër momentet më të veçanta të angazhimit të saj politik. Sipas saj, diaspora ka luajtur rol të rëndësishëm në periudhat më të vështira të vendit, duke mbajtur gjallë shpresën dhe duke kontribuar në ringritjen e shtetit.

Në fund të mesazhit, Osmani rikujtoi edhe rëndësinë e përfshirjes së diasporës në vendimmarrje, duke theksuar se sa më afër të jetë mërgata me proceset politike, aq më e fortë do të jetë Kosova. "Sa më afër e kemi mërgatën në çdo vendim, aq më e fortë do të jetë Kosova. Kosovën e kemi të përbashkët, pavarësisht se ku jetojmë. Regjistrohuni, votoni dhe ndikoni", përfundoi ajo mesazhin e saj.

Burim: Albinfo.ch
— Redaksia ZHURMA