Trump: 'Ato ditë kanë marrë fund' — zotohet për llogari nga DOJ

UASHINGTON — Presidenti i Shteteve të Bashkuara, Donald Trump, foli të premten, më 14 mars 2025, nga selia e Departamentit të Drejtësisë në Uashington, ku u zotua për llogaridhënie ndaj atyre që kryen hetime ndaj tij gjatë periudhës jashtë detyrës.

"Pararendësit tanë e shndërruan këtë Departament të Drejtësisë në Departamentin e Padrejtësisë. Por, unë gjendem sot këtu përpara jush për të deklaruar se ato ditë kanë marrë fund dhe nuk do të rikthehen më kurrë", tha Presidenti Trump.

Gjatë viteve kur nuk ishte në detyrë, departamenti ngriti dy herë akuza ndaj tij: njëra për mbajtjen e dokumentave të klasifikuara në pronën e tij në Florida, dhe tjetra për përpjekjet për të përmbysur rezultatin e zgjedhjeve presidenciale të vitit 2020. Të dyja dosjet u pushuan pasi Trump fitoi zgjedhjet e nëntorit 2024.

"Tashmë, si zyrtari më i lartë ligjzbatues në vendin tonë, unë do të këmbëngul dhe do të kërkoj llogaridhënie të plotë dhe gjithëpërfshirëse për shkeljet dhe abuzimet që kanë ndodhur. Populli amerikan na ka dhënë një mandat", tha ai.

Administrata e re ka shkarkuar prokurorët që e hetuan Trump gjatë administratës Biden dhe po shqyrton punën e mijëra agjentëve të FBI-së që hetuan disa nga mbështetësit e tij që hynë në Kapitol më 6 janar 2021. Drejtori i FBI-së Kash Patel dhe Prokurorja e Përgjithshme Pam Bondi ishin të pranishëm gjatë fjalimit.

Ligjvënësi Jamie Raskin, drejtues demokrat në Komisionin për Gjyqësorin në Dhomën e Përfaqësuesve, e quajti fjalimin "një shkelje tronditëse të kufijve tradicionalë ndërmjet zbatimit të pavarur të legjislacionit penal dhe kompetencave politike presidenciale". Raskin shtoi se "asnjë president tjetër në historinë amerikane nuk ka shpallur nga brenda selisë së Departamentit të Drejtësisë një axhendë hetimesh penale dhe ndëshkimesh ndaj kundërshtarëve të tij politikë".

Burim: VOA Shqip
— Redaksia ZHURMA