Dy të arrestuar pas helmimit të 56 studentëve policorë në Tiranë

TIRANË — Dy persona janë arrestuar dhe një tjetër kërkohet nga policia shqiptare pas helmimit masiv të 56 studentëve të Akademisë së Sigurisë në Tiranë, njoftoi Policia e Shtetit të enjten.

Studentët shfaqën shenja sëmundjeje pasi drekuan në ambientet e Akademisë të mërkurën dhe u dërguan menjëherë në spital për mjekim. Autoritetet shëndetësore thanë se të gjithë u liruan nga spitali dhe ndodhen në gjendje të mirë shëndetësore.

Policia arrestoi kuzhinierin dhe teknologen e ushqimit të kompanisë private të kontraktuar për furnizimin e Akademisë. Administratorja e kompanisë kërkohet ende, ndërsa një teknologe tjetër po hetohet në liri.

Sipas Autoritetit Kombëtar të Ushqimit, kompania kontraktuese nuk e gatuante ushqimin në ambientet e Akademisë, por e sillte të gatshëm nga jashtë. Gjatë kontrollit, autoritetet sekuestruan 85.9 kilogramë produkte të gatuara gati për shërbim dhe morën mostër për analizim mikrobiologjik. Në ambientet e kompanisë u bllokuan edhe 67 kilogramë produkte të tjera.

Kompania u gjobit me rreth 2.000 euro për mungesë të një sistemi funksional dhe të plotë gjurmimi. Rasti hetohet si vepër penale e importimit, prodhimit, shitjes dhe ruajtjes së ushqimeve të rrezikshme për shëndetin ose jetën e njerëzve, sipas Policisë.

Akademia e Sigurisë, e ndodhur në Sauk në periferi të Tiranës, është institucioni publik ku trajnohen punonjës të Policisë së Shtetit dhe agjencive të tjera ligjzbatuese. Aty zhvillohet edhe programi Bachelor në Siguri dhe Hetim për oficerët e policisë.

Burim: Evropa e Lire
— Redaksia ZHURMA