Dimitrievski: ZNAM largohet nga Qeveria nëse provimi i jurisprudencës bëhet në shqip

Lëvizja ZNAM nuk do të pranojë që provimi i jurisprudencës të mbahet në një gjuhë tjetër përveç maqedonishtes, duke paralajmëruar largimin nga koalicioni qeveritar nëse Qeveria merr një vendim ndryshe. Kështu deklaroi lideri i kësaj partie, Maksim Dimitrievski, gjatë një intervistë për televizionin «Sitel», duke shtuar se kryeministri Hristijan Mickoski është në dijeni të qëndrimeve të tyre.

Dimitrievski theksoi se në takimin e ardhshëm me kryeministrin do të kërkojë një takim liderësh për të vendosur vijat e kuqe, pasi kjo çështje nuk është diskutuar kurrë hapur mes partnerëve. Sipas tij, kërkesat për përdorimin e gjuhës shqipe në këtë fushë bien në kundërshtim me rekomandimet e Komisionit të Venecias të vitit 2019 dhe fshehin qëllime më të gjera politike për shndërrimin e vendit në konfederatë. Kreu i ZNAM-it përmendi gjithashtu se nuk është kundër përdorimit të gjuhëve të komuniteteve etnike, duke marrë si shembull Kumanovën, por shtoi se nuk do të lejojë komplikimin e mëtejshëm të shtetit.