Përplasje mes Sulejmanit dhe Hasanit për infrastrukturën dhe meritat

Driton Sulejmani nga VLEN dhe Ilir Hasani nga BDI janë përplasur në emisionin “Debat në Shenja” lidhur me projektet infrastrukturore dhe raportet mes partnerëve të koalicionit qeveritar VMRO-DPMNE dhe VLEN. Sulejmani deklaroi se çështja e Bërvenicës nuk ka lënë pasoja në raportet mes subjekteve politike dhe shtoi se kanë nisur të lëvizin punët për disa projekte të rëndësishme, duke përfshirë rrugën Tetovë-Prizren dhe duke kritikuar qeverisjen e kaluar për ngecjet te rruga Shkup-Bllacë.

Nga ana e tij, Ilir Hasani ka hedhur akuza ndaj VLEN-it për mospërputhje mes qëndrimeve të dikurshme në opozitë dhe veprimeve aktuale, duke kujtuar se Korridori 8 ishte projekt i BDI-së dhe se opozita e dikurshme dikur kishte ngritur akuza për korrupsion. Hasani gjithashtu u shpreh se nuk është e këndshme të manipulohet opinioni publik rreth punimeve për rrugën Shkup-Bllacë, ndërsa Sulejmani kundërpërgjigj duke kërkuar përqendrim te rezultatet konkrete dhe duke vënë në dyshim punët e kaluara.