BDI: Në Akademinë Ushtarake nuk është pranuar asnjë kadet shqiptar

Bashkimi Demokratik për Integrim (BDI) ka reaguar publikisht duke pretenduar se në Akademinë Ushtarake nuk është pranuar asnjë kadet shqiptar, diçka që sipas kësaj partie politike ndodh për herë të parë që nga themelimi i këtij institucioni arsimor ushtarak në vitin 1995.

Siç raportoi Zhurma më 22 tetor 2026, në Shkup kishte nisur rrugëtimi i gjeneratës së 30-të të kadetëve ku ishin betuar gjithsej 34 kadetë në Akademinë Ushtarake, në mesin e të cilëve kishte edhe përfaqësues nga Bosnja dhe Hercegovina.

Sipas BDI-së, ky pretendim mbi pranimin e zero kadetëve shqiptarë ngre pikëpyetje mjaft serioze për rolin si dhe për ndikimin e koalicionit VLEN brenda institucioneve shtetërore, meqë përfaqësimi i shqiptarëve duhet të jetë jo vetëm një parim deklarativ por edhe një realitet i prekshëm institucional. Po ashtu, BDI-ja ka deklaruar se përgjegjësia politike për këtë situatë nuk mund të mbetet vetëm te koalicioni VLEN, por i takon edhe vetë Qeverisë. Nga kjo parti opozitare është theksuar se mirëbesimi ndërmjet partnerëve politikë nuk ndërtohet përmes deklaratave, por me anë të respektimit të barazisë, përfaqësimit dhe marrëveshjeve politike. BDI-ja ka nënvizuar se raste të tilla cenojnë drejtpërdrejt frymën e Marrëveshjes së Ohrit, dobësojnë parimin kryesor të përfaqësimit të drejtë dhe adekuat, si dhe vënë në pikëpyetje serioze marrëdhëniet ndëretnike në vend.

Nga kjo parti politike kërkojnë përgjigje publike nga koalicioni VLEN lidhur me premtimet e bëra me parë për përfaqësimin e shqiptarëve, duke e cilësuar këtë ngjarje si një praktikë me zero shqiptarë dhe si turpin e radhës në institucionet shtetërore.

«Turpi i radhës i VLEN-it dhe praktika me zero shqiptarë vazhdon në Akademinë Ushtarake. Pēr herë të parë që nga themelimi i Akademisë Ushtarake në vitin 1995 nuk pranohet asnje kadet shqiptar. Ky fakt ngre pikëpyetje serioze për rolin dhe ndikimin e VLEN-it në institucionet shtetërore ku përfaqësimi i shqiptarëve duhet të jetë jo vetëm parim deklarativ, por edhe realitet institucional. Por përgjegjësia nuk mund të ndalet vetëm te VLEN-i. Qeveria duhet të kuptojë se mirëbesimi ndërmjet partnerëve politikë nuk ndërtohet përmes deklaratave, por përmes respektimit të barazisë, përfaqësimit dhe marrëveshjeve politike. Edhe më shqetësues është fakti se raste të tilla e cenojnë frymën e Marrëveshjes së Ohrit, dobësojnë parimin e përfaqësimit të drejtë dhe adekuat dhe i vënë në pikëpyetje marrëdhëniet ndër-etnike. VLEN-i duhet të japë përgjigje: Ku mbeti përfaqësimi që premtohej? Sepse kështu nuk ndërtohet mirëbesimi, nuk respektohet përfaqësimi dhe nuk forcohet bashkëjetesa institucionale. Kështu nuk përfaqësohen shqiptarët! Përfaqësimi nuk është privilegj, por parim. Dhe ai nuk mund të mbetet peng i kalkulimeve politike !», kanë deklaruar nga BDI.