Dimitrievski: Provimi i jurisprudencës do të mbahet në gjuhën maqedonase

Kryetari i Lëvizjes ZNAM, Maksim Dimitrievski, ka deklaruar se provimi i jurisprudencës do të mbahet në gjuhën maqedonase për sa kohë që subjekti i tij politik mbetet pjesë e Qeverisë. Gjatë një paraqitjeje në Koçan, ku u prezantuan rezultatet e punës dyvjeçare të partisë në takimet me qytetarët, kreu i ZNAM-it u ndalur te debatet dhe kërkesat e fundit rreth mënyrës së dhënies së këtij provimi, duke përjashtuar çdo mundësi ndryshimi.

Duke iu përgjigjur kërkesave dhe presioneve publike, Dimitrievski ka përsëritur se qëndrimi i partisë mbetet i palëkundur dhe se respektohen plotësisht kornizat ligjore. «Përderisa ZNAM është pjesë e Qeverisë, provimi i jurisprudencës do të jepet në përputhje me ligjin dhe Kushtetutën, në gjuhën maqedonase. Mund të ketë kërkesa, presione dhe spekulime të ndryshme, por qëndrimi ynë është i qartë. Këto janë vijat tona të kuqe dhe nuk do të tërhiqemi prej tyre», u shpreh ai, duke shtuar se nuk do të pranohen kompromise që bien ndesh me rendin kushtetues.