Dëshmojnë dy menaxherët e hotelit në rigjykimin e Endrit Nikës

Në Gjykatën Themelore në Prishtinë ka vijuar rigjykimi ndaj Endrit Nikës, i cili po akuzohet nga prokuroria se në vitin 2023 ka hedhur nga kati i gjashtë i një hoteli në Fushë Kosovë të dashurën e tij nga Argjentina, Maria Clara Urdangaray.

Në seancën e mbajtur, para trupit gjykues dëshmoi Fehmi Zabeli, menaxher në hotel, i cili deklaroi se nuk i kishte parë asnjëherë më parë të akuzuarin dhe viktimën. Dëshmitari tregoi se natën e ngjarjes kishte qëndruar në hotel, në një dhomë dy kate më lart se vendi ku dyshohet se ndodhi rasti, dhe se për ngjarjen ishte informuar pasi e kishte telefonuar roja i objektit, me emrin Ramiz.

«Jo, nuk i kam parë asnjëherë», tha Zabeli kur u pyet nëse kishte rastisur t'i shihte ata. Ai shtoi se pasi kishte zbritur poshtë nuk e kishte parë viktimën, por kishte parë pjesëtarë të policisë, një djalë dhe disa xhama, ndërsa më pas kishte njoftuar edhe Mirlindin, menaxherin tjetër të hotelit.