IKD propozon ndryshime ligjore për Byronë e Pasurisë

Instituti i Kosovës për Drejtësi (IKD) ka paraqitur një hulumtim lidhur me projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme, i përgatitur për shqyrtim ndërmjet dy leximeve në Kuvend. Hulumtuesi Gzim Shala ka bërë të ditur se ky dokument përmban formulime të sakta për amendamente që adresojnë çështje të mbetura pa u rregulluar plotësisht.

Sipas organizatës, zgjedhja e drejtorit të përgjithshëm dhe e anëtarëve të Komisionit Mbikëqyrës kërkon fuqizim të pavarësisë, ndaj është sugjeruar që ata të marrin së paku 61 vota në Kuvend, në vend të shumicës së deputetëve të pranishëm që votojnë. Po ashtu, kërkohet themelimi i një Divizioni për Konfiskim Civil edhe në Gjykatën e Apelit për të siguruar specializim gjyqësor në dy shkallët, ndërsa projektligji aktual parasheh një divizion të tillë vetëm në shkallën e parë në Prishtinë.

Raporti propozon gjithashtu përcaktimin e një pragu prej 25 mijë eurosh për mospërputhjet e pasurisë deri në pesë vjet pas mbarimit të funksionit publik, si dhe vlerësimin paraprak të bazueshmërisë nga gjykata përpara se barra e provës t'i kalojë palës përmes një vendimi të formës së prerë.