Wikoff, Vergori e Hoxha inspektojnë patrullimet e përbashkëta në veri
Përfaqësuesit e lartë të NATO-s, KFOR-it dhe Policisë së Kosovës kanë vëzhguar nga afër situatën e sigurisë në veri të vendit.
Redaksia ZHURMA · · Përditësuar · 1 min lexim
Admirali George M. Wikoff, në cilësinë e komandantit të Forcave të Përbashkëta Aleate të NATO-s në Napoli, së bashku me komandantin e ri të KFOR-it, gjeneralmajor Roberto Vergori, dhe drejtorin e Policisë së Kosovës, Gazmend Hoxha, kanë zhvilluar një vizitë në pjesën veriore të vendit. Gjatë këtij qëndrimi, krerët ushtarakë dhe policorë kanë përcjellë nga afër efektivët e dy forcave teksa kryenin patrullime të përbashkëta përgjatë asaj zone.
Në kuadër të kësaj vizite, komandanti i NATO-s në Napoli dhe kreu i KFOR-it janë takuar gjithashtu me kryetarin e Komunës së Zubin Potokut, Milosh Peroviq. Sipas njoftimit zyrtar të misionit paqeruajtës, gjatë këtij takimi është diskutuar dhe vlerësuar gjendja aktuale e sigurisë në atë komunë. Misioni ka bërë të ditur se do të vazhdojë monitorimin e rregullt të zhvillimeve në terren, bashkëpunimin me të gjitha komunitetet dhe ruajtjen e gatishmërisë operacionale.
«KFOR-i vazhdon të vlerësojë rregullisht situatën në terren, të angazhohet me të gjitha komunitetet dhe të ruajë gatishmërinë operacionale. Ai mbetet i përkushtuar për përmbushjen e misionit të tij me profesionalizëm dhe paanshmëri», thuhet në njoftim.
