22 vjet burgim për vrasjen e fqinjit në Klinë
Gjykata Themelore në Pejë ka caktuar dënim unik prej 22 vjetësh burgim për të pandehurin A.N. lidhur me ngjarjen e vitit 2022.
Redaksia ZHURMA · · 2 min lexim
Një dënim unik prej 22 vjetësh burgim është caktuar ndaj të pandehurit A.N. nga Departamenti i Krimeve të Rënda në Gjykatën Themelore në Pejë, pasi u shpall fajtor për tri vepra penale, ku përfshihen vrasja dhe vrasja e rëndë në tentativë. Trupi gjykues për këtë çështje është kryesuar nga Musë Povataj, me anëtarë Veton Ademajn dhe Shaqë Currin.
Sipas aktgjykimit, për veprën penale të vrasjes janë caktuar 19 vjet burgim, për vrasjen e rëndë në tentativë pesë vjet, ndërsa për mbajtjen, kontrollin ose posedimin e paautorizuar të armëve një vit. Pas shqiptimit të dënimeve individuale, gjykata ka caktuar dënimin unik. Gjykata ka urdhëruar gjithashtu konfiskimin e armëve dhe municionit të sekuestruar, kurse paraburgimi ndaj të dënuarit vazhdon deri në marrjen e formës së prerë të aktgjykimit, por jo më gjatë se dënimi unik i shqiptuar.
M.A. dyshohet se u vra nga fqinji i tij në prill të vitit 2022. Vrasjes dyshohet se i parapriu një zënkë mes disa familjarëve të viktimës dhe të dyshuarit, që eskaloi në rrahje. Në kohën kur ndodhi vrasja, një familjar i të dyshuarit po intervistohej nga policia në cilësinë e viktimës për rrahje.
