Sa vizita morën qendrat shëndetësore verore në dy javët e para të qershorit?

TIRANË — Qendrat shëndetësore verore vijojnë pa ndërprerë ofrimin e shërbimeve mjekësore për pushuesit në të gjitha zonat turistike të vendit. Me stafe të dedikuara, ekipet mjekësore janë çdo ditë në terren për garantimin e kujdesit shëndetësor ndaj qytetarëve dhe vizitorëve. Operatori i Shërbimit të Kujdesit Shëndetësor (OSHKSH) bën me dije se 8.057 pacientë morën shërbim në qendrat shëndetësore verore nga 1–21 qershor.

Për periudhën 15–21 qershor 2026, në qendrat shëndetësore verore janë realizuar gjithsej 3.117 vizita mjekësore. Nga këto, 22% e rasteve u përkasin pushuesve të huaj, duke reflektuar rritjen e fluksit turistik në vend gjatë sezonit veror. Sipas të dhënave të raportuara, diagnozat më të shpeshta të trajtuara gjatë kësaj periudhe kanë qenë hipertension arterial, pickime insektesh dhe reaksione alergjike dhe viroza të ndryshme sezonale. OSHKSH bën të ditur se qendrat me numrin më të lartë të vizitave gjatë kësaj jave kanë qenë në Velipojë, Shëngjin dhe Pogradec.

Prania e shtuar e shërbimeve shëndetësore në zonat turistike ka kontribuar në ofrimin në kohë të ndihmës mjekësore për pushuesit, duke garantuar një sezon turistik më të sigurt dhe më të shëndetshëm. Gjatë sezonit turistik veror janë në funksion të plotë 36 qendra shëndetësore në të gjithë vendin, nga veriu në jug. Risi për këtë vit janë dy qendra të reja shëndetësore verore që do të funksionojnë 24/7: një e dedikuar turizmit fetar pranë Kishës së Shën Ndout në Laç dhe tjetra pranë llixhave të Elbasanit. Gjithashtu, dy qendra të reja shëndetësore janë hapur pranë destinacioneve me interes kulturor, kalaja e Beratit dhe kalaja e Gjirokastrës.

Në veri funksionojnë 8 qendra shëndetësore, nga të cilat pesë janë në zonat turistike malore Bogë, Valbonë, Razëm, Tamarë dhe Theth dhe katër të tjera në plazhet Velipojë, Rrjollë, dhe Shëngjin e Tale në Lezhë. Në Durrës funksionojnë 5 qendra shëndetësore, konkretisht në plazhet Gjiri i Lalëzit, Currila, Plazhi i Vjetër dhe Shkëmbi i Kavajës, Spille, ndërsa në Kavajë funksionojnë qendrat 24-orëshe në plazhet Golem dhe Mali i Robit.

Në rajonin e jugut funksionojnë gjithsej 14 qendra shëndetësore verore, të cilat kanë vendndodhjen përkatësisht në: Pogradec; Lushnjë në plazhin e Divjakës; Fier në plazhin Darëzezës; Vlorë në katër plazhe, konkretisht në Zvërnec, Plazhi i Vjetër (Vlorë), Radhimë, Orikum. Në Bashkinë Himarë në 6 plazhe, konkretisht në: Palasë, Dhërmi; Drimadhes, Himarë dhe Qeparo. Në Sarandë në plazhet Borsh, Ksamil i Vjetër dhe Ksamil i Ri.

OSHKSH thekson se ekipet mjekësore do të vazhdojnë punën gjatë gjithë sezonit veror, me qëllim përballimin e fluksit në rritje të vizitorëve dhe ofrimin e kujdesit shëndetësor cilësor në çdo zonë turistike të vendit. Shtimi i njësiteve 24/7 tregon se sistemi po përgatitet për një sezon që pritet të kalojë shifrat e këtij qershori.

Burim: ATSH
— Redaksia ZHURMA