Tkurrja e lindjeve në Shqipëri, dhjetë qarqe shënojnë rënie

Shqipëria po përballet me zhvillime demografike ku në shumicën e qarqeve regjistrohen më shumë vdekje sesa lindje, ndërsa shtatë nga dymbëdhjetë qarqe rezultojnë me bilanc negativ natyror gjatë tremujorit të tretë të vitit 2026. Sipas të dhënave të INSTAT-it, në shkallë vendi u regjistruan 5.787 lindje dhe 5.045 vdekje, duke sjellë një bilanc pozitiv prej 742 lindjesh më shumë se vdekje, pavarësisht se lindjet kanë rënë me 10,5% kur krahasohen me të njëjtën periudhë të vitit paraprak. Faktorë si emigracioni, numri i ulët i lindjeve dhe ndryshimet në strukturën e popullsisë ndikojnë në raportin mes lindjeve dhe vdekjeve.

Tirana kryeson në nivel vendi me 2.708 foshnje të ardhura në jetë dhe 1.328 vdekje, duke shënuar shtesën më të lartë natyrore me 1.380 lindje më shumë se vdekje, ndërsa Gjirokastra regjistron vetëm 66 lindje. Në krahun tjetër, Korça mban rekordin më negativ me 220 vdekje më shumë se lindje. Dhjetë qarqe kanë shënuar rënie të lindjeve krahasuar me tremujorin e tretë të vitit të kaluar, ku tkurrja më e fortë u shënua në Fier me 20,1%, kurse Dibra pati rritjen më të lartë prej 3,9%. Vdekjet u rritën në shtatë qarqe, me Kukësin që regjistroi rritjen më të madhe prej 15,7% dhe Dibrën që shënoi rënien më të fortë prej 17,8%. Për të nxitur lindjet, qeveria ka rishikuar skemën e bonusit të bebes, duke ndryshuar mënyrën e mbështetjes financiare për familjet.