Koçiu: Mbi 1272 qytetarë kanë dërguar mesazhe në platformën «Fol me Kryeministrin»

Më shumë se 1272 qytetarë janë regjistruar deri më tani në hapësirën digjitale «Fol me Kryeministrin», ndërsa mbi 220 prej tyre kanë marrë përgjigje për kërkesat e tyre, njoftoi zëvendëskryeministrja Albana Koçiu përmes një reagimi në rrjetet sociale.

Hapësira digjitale e dialogut «Fol me Kryeministrin» u prezantua pak javë më parë si një kanal i ri komunikimi online. Ky mjet u krijua posaçërisht për të mundësuar ndërveprimin e drejtpërdrejtë të publikut me kreun e qeverisë dhe strukturat ekzekutive.

Sipas zëvendëskryeministres Koçiu, shqyrtimi i mesazheve bëhet nga një ekip i posaçëm me të cilin ajo u takua, për të përgatitur kthimin e përgjigjeve nga vetë Kryeministri ose nga institucionet përgjegjëse. Për të shfrytëzuar këtë mundësi komunikimi, përdoruesit duhet të hyjnë në faqet fol.km.al ose folmekm.al dhe të kryejnë identifikimin nëpërmjet sistemit «e-Albania». Me anë të kësaj procedure, secili mund të parashtrojë pyetje, kritika ose ide, duke pasur opsionin ta bëjë këtë në mënyrë publike apo anonime.

Rregullorja e këtij kanali online parashikon ruajtjen e konfidencialitetit të përdoruesve pa pëlqimin e tyre paraprak. Koçiu sqaroi se qytetarët mund të shprehen lirshëm pa qenë e nevojshme të jenë dakord me qeverinë. Gjithashtu, parashikohet publikimi periodik i përmbledhjeve me tematikat kryesore të ngritura, përgjigjet e dhëna dhe hapat e ndërmarrë.

«Zëri yt dëgjohet, merr përgjigje dhe zgjidhje konkrete! Nëse ke një pyetje, kritikë apo një ide që do t’ia thuash Kryeministrit: Hyr në folmekm.al Çdo mesazh lexohet dhe merr vëmendjen e duhur, për t’u kthyer në përgjigje dhe zgjidhje konkrete. Deri më tani, mbi 1,272 qytetarë janë bërë pjesë e platformës, prej të cilëve mbi 220 kanë marrë përgjigje. Dritarja e dialogut është e hapur», shkroi Koçiu.