Kumbaro: Plani social dhe gjithëpërfshirja janë prioritet i buxhetit për arsimin

Në Komisionin për Ekonominë, Financat dhe Punësimin është shqyrtuar projektbuxheti dhe investimet e parashikuara për sektorin e arsimit për vitin 2027. Ministrja e Arsimit Mirela Kumbaro deklaroi se institucioni që drejton do të administrojë një buxhet prej 67,95 miliardë lekësh, ndërsa fondet e përgjithshme për arsimin do të arrijnë në 93,7 miliardë lekë, me synim që deri në vitin 2029 ky sektor të kalojë për herë të parë pragun e 100 miliardë lekëve. Sipas saj, totali i vitit 2027 shënon një rritje prej 3,8 miliardë lekësh krahasuar me buxhetin fillestar të vitit paraprak.

Gjatë fjalës së saj, ministrja Kumbaro theksoi se arsimi parauniversitar do të përfitojë 1 miliardë lekë më shumë, duke i dhënë prioritet planit social dhe masave për gjithëpërfshirjen. Ndër nismat kryesore u përmend ndryshimi i raportit të mësuesve ndihmës për fëmijët me aftësi ndryshe, duke kaluar nga një mësues për katër nxënës në një mësues për çdo fëmijë. Shifra e nxënësve të kësaj kategorie në sistemin parauniversitar ka shkuar në 6039, nga rreth 4000 që ishin në periudhën 2024-2025. Programet e përfshirjes përfshijnë gjithashtu mbështetjen e fëmijëve romë dhe egjiptianë, punësimin e 150 punonjësve të rinj të shërbimit psiko-social, si dhe sigurimin e teksteve falas, transportit dhe bursave të indeksuara me inflacionin për familjet në nevojë.

Sa i takon infrastrukturës arsimore, ministrja theksoi se gjatë periudhës 2024–2026 janë financuar 120 objekte, ndërsa për vitet 2027–2029 planifikohet ndërtimi ose rikonstruksioni i rreth 120 të tjerave me vlerë 88 milionë euro. Vetëm për vitin 2027 do të financohen 54 projekte në arsimin bazë dhe të mesëm, ndërsa po punohet edhe për pajisjen e shkollave të rehabilituara, klasave Smart dhe Liceut Francez të Korçës me mjedise e mobilje të reja.