Zjarr fatal në Kërçovë, 37-vjeçar humbet jetën
Një person humbi jetën si pasojë e një zjarri që përfshiu banesën e tij në rrugën '4 Korriku'
— KËRÇOVË — Një ngjarje e rëndë ka tronditur qytetin e Kërçovës pasditen e djeshme, ku një person humbi jetën si pasojë e një zjarri që përfshiu banesën e tij. Sipas njoftimit zyrtar të Ministrisë së Brendshme, sinjali për flakët në një apartament në rrugën '4 Korriku' ka mbërritur në Stacionin Rajonal të Policisë Kërçovë rreth orës 18:55, nga ana e Njësisë Territoriale të Zjarrfikësve.
Pas ndërhyrjes për shuarjen e zjarrit, ekipet e zjarrfikësve të Kërçovës kanë zbuluar brenda ambientit trupin e pajetë dhe të djegur të S.S., 37 vjeç, banues në këtë qytet. Mjeku i shërbimit emergjent ka konstatuar vdekjen e 37-vjeçarit në vendngjarje.
Menjëherë pas kësaj, autoritetet kanë nisur procedurat hetimore. Një prokuror publik, së bashku me një ekip të specializuar nga Drejtoria e Punëve të Brendshme të Kërçovës, kanë kryer inspektimin e hollësishëm të zonës për të zbardhur rrethanat e këtij incidenti tragjik.
Burim: Insajderi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr për me e thanë mendimin.