Shoqata Shqiptare e Turizmit kërkon pezullimin e rritjes së TVSH-së në akomodim

Shoqata Shqiptare e Turizmit ka reaguar ndaj projektvendimit të qeverisë për rritjen e TVSH-së në shërbimin e akomodimit nga 6% në 10%, duke e cilësuar atë si një goditje të drejtpërdrejtë ndaj konkurrueshmërisë së turizmit.

Zbatimi i mëparshëm i shkallës së reduktuar të TVSH-së prej 6% erdhi si rezultat i një rruge të gjatë avokimi nga Shoqata Shqiptare e Turizmit, e cila bindi FMN-në dhe Qeverinë Shqiptare, ndërsa vetë Kryeministri pati angazhuar ekspertë nga Universiteti i Harvardit për të hartuar raportin për ringritjen e sektorit sipas modelit të Këshillit Evropian.

Sipas Shoqatës Shqiptare të Turizmit, ky projektvendim u ndërmarrë pa asnjë konsultim paraprak dhe pa një analizë të mirëfilltë ndikimi, në një moment kur bizneset po përballen me rënien drastike të euros prej 40%, dyfishimin e pagave dhe rritjen e çmimeve të lëndëve të para nga kriza globale.

Të dhënat zyrtare tregojnë se numri i vizitorëve ishte rritur nga 6 milionë në 12,6 milionë, duke e çuar kontributin e sektorit në 1/4 e PPB-së dhe 44% të eksporteve, ndërsa INSTAT raporton se me 12,4 milionë turistë regjistrohen vetëm 10 milionë netë fjetje.

Gjithashtu, sipas Strategjisë së Turizmit 2026–2030, 78% e kapaciteteve akomoduese përbëhen nga apartamente me qira ditore në informalitet, ndërsa vetëm 22% janë hotele, me Shqipërinë që posedon vetëm 1% hotele me 4-5 yje, krahasuar me 7% deri në 10% në Mali të Zi dhe Kroaci.

Përballë kësaj situate, Shoqata Shqiptare e Turizmit i bën thirrje qeverisë të pezullojë projektvendimin, të nisë konsultimet me grupet e interesit dhe të përqendrojë kapacitetet te lufta kundër informalitetit për të mbrojtur tregun rajonal.