Policia paralajmëron përdoruesit për skemën e mashtrimit në WhatsApp

Një skemë mashtrimi në WhatsApp, e njohur si “Ghost Pairing”, është rikthyer në vëmendje, ndërsa autoritetet policore kanë dhënë paralajmërime për rrezikun e marrjes së kontrollit të llogarive nga persona të panjohur. Sipas mediave gjermane dhe zvicerane, keqbërësit shfrytëzojnë funksionin e lidhjes së pajisjeve për të siguruar qasje në llogaritë e përdoruesve dhe për t'u dërguar mesazhe kontakteve të viktimave duke kërkuar para në emër të tyre.

Procesi nis zakonisht përmes një mesazhi nga një njohur, ku përdoruesi merr një lidhje për një votim apo konkurs, si dhe udhëzime për të skanuar një kod QR ose për të konfirmuar lidhjen e një pajisjeje. Një rast i shënuar në Gjermani përfshiu një 26-vjeçar nga rajoni i Oberpfalz-it, i cili transferoi një shumë prej disa qindra eurosh pas një kërkese për ndihmë financiare, para se të kuptonte se llogaria e të njohurit të tij ishte kompromentuar dhe të njoftonte autoritetet.

Për t'u mbrojtur nga ky rrezik, përdoruesit udhëzohen të kontrollojnë rregullisht seksionin e pajisjeve të lidhura, të shkëputin çdo pajisje të panjohur, të aktivizojnë verifikimin me dy hapa dhe të mos ndajnë kodet e verifikimit. Ekspertët theksojnë se rreziku kryesor qëndron te fakti se aplikacioni mund të vazhdojë të funksionojë normalisht në telefonin e viktimës edhe pasi një pajisje tjetër të ketë fituar qasje.