Tre kosovarë humbin jetën në aksident afër Shkupit

SHKUP — Tre qytetarë nga Vushtrria humbën jetën në një aksident trafiku në Maqedoninë e Veriut, pasi vetura me të cilën po udhëtonin, doli nga rruga dhe u gjet e përmbysur në aksin mes pikëkalimit kufitar Bllacë dhe Shkupit.

Ministria e Punëve të Brendshme e Maqedonisë së Veriut bëri të ditur se automjeti, një “Mercedes” me targa gjermane, u gjet mbrëmjen e 19 korrikut, rreth orës 22:35. Në vendin e ngjarjes, policia gjeti tre persona pa shenja jete - një burrë dhe dy gra.

Ekipi i ndihmës së shpejtë konfirmoi vdekjen e tyre. Sipas autoriteteve maqedonase, disa orë më herët, një shtetas i Kosovës kishte raportuar në polici zhdukjen e tre personave. Kontakti i fundit me ta ishte regjistruar mbrëmjen e 18 korrikut, kur ata ndodheshin në Aeroportin Ndërkombëtar të Shkupit.

Vdekjen e tre qytetarëve e konfirmoi edhe kryetari i Komunës së Vushtrrisë, Ferit Idrizi. Në shenjë zie, komuna njoftoi se janë shtyrë koncertet e planifikuara në kuadër të manifestimit “Ditët e Diasporës 2026”. Komuna shprehu ngushëllime për familjet Tërnava dhe Shabani, duke theksuar se vendimi për shtyrjen e aktiviteteve është marrë në shenjë respekti dhe solidarizimi me familjarët e viktimave.

Ngushëllime shprehu edhe ushtruesja e detyrës së presidentit të Kosovës, Albulena Haxhiu, duke theksuar se institucionet e Kosovës bashkëndjejnë me familjarët në këto momente të rënda.

Ngushëllime shprehu edhe kryeministri i Kosovës, Albin Kurti, i cili u solidarizua me familjet e viktimave — Ejup Tërnava, Cennet Tërnava dhe Fatmire Shabani. Trupat e pajetë u dërguan në Kosovë.

Burim: Evropa e Lirë, https://www.evropaelire.org/a/tre-kosovar%c3%ab-humbin-jet%c3%abn-n%c3%ab-nj%c3%ab-aksident-trafiku-n%c3%ab-maqedonin%c3%ab-e-veriut/33807406.html
— Redaksia ZHURMA