Minarolli: Tumori 3.1 kg në hundën e të moshuarit doli beninj

Masa tumorale prej 3.1 kilogramësh e hequr nga hunda e një pacienti të moshuar në Qendrën Spitalore Universitare «Nënë Tereza» ka rezultat beninj dhe nuk ka përhapje. Sipas mjekut ORL Tedi Minarolli, ndërhyrja kirurgjikale zgjati rreth një orë e 30 minuta dhe pacienti tani paraqitet në gjendje të mirë shëndetësore gjatë ndjekjes nga ekipi mjekësor.

Më parë ishte raportuar se një ekip specialistësh të Otorinolaringologjisë hoqën një tumor me peshë 3.1 kilogramë nga hunda e një pacienti, duke shënuar një ndërhyrje të pazakontë për nga përmasat e masës së hequr.

Kirurgu Tedi Minarolli bëri me dije se masa kishte një gjatësi apo perimetër prej 50 centimetrash dhe se ndërhyrja kishte vështirësi të nivelit mesatar nga ana teknike. Ai tregoi se kur pa fotografinë e parë para referimit për trajtim, mendoi se ishte një imazh i krijuar me inteligjencë artificiale. Sipas mjekëve, pacienti ishte i burgosur dhe kjo rrethanë mund të ketë ndikuar në refuzimin e trajtimeve shëndetësore, duke çuar në rritjen e masës pas një periudhe të gjatë neglizhence. Masa kishte shkaktuar deformim dhe zhvendosje të hundës në fytyrë, por pa i penguar funksionet e saj.

Ndërhyrja u realizua dy javë pas konsultës së parë nga ekipi i ORL-së nën drejtimin e Birkena Qirjazit dhe Tedi Minarollit, me pjesëmarrjen e mjekëve Kristi Tata e Arli Kokomani, si dhe me kujdesin e ekipit të reanimacionit. Shefja e shërbimit të ORL-së, Birkena Qirjazi, u shpreh e shqetësuar për rritjen e numrit të pacientëve që kërkojnë ndihmë mjekësore në faza të vonshme, duke mbetur optimiste për punën e mjekëve të rinj.