Toshkovski: Edhe zyrtarët po gjobiten nga kamerat e Safe City

Ministra, drejtorë, zyrtarë dhe përfaqësues të kishës janë ndër personat që kanë marrë gjoba nga sistemi i kamerave «Safe City», siç deklaroi ministri i Punëve të Brendshme, Pançe Toshkovski. Sipas tij, të gjitha gjobat janë shlyer pavarësisht faktit nëse shkeljet janë kryer përmes automjeteve private apo zyrtare, ndërsa kamerat nuk bëjnë dallim mes qytetarëve dhe bartësve të funksioneve publike.

Toshkovski shtoi se gjatë një viti e gjysmë të fundit nuk është shënuar asnjë përpjekje për ndërhyrje në rastet konkrete të kundërvajtjeve në trafik. Zbatimi i këtij sistemi ka sjellë rezultate pozitive në sigurinë rrugore, duke kontribuar në uljen për 30 për qind të numrit të viktimave në aksidente, ndërsa nga data 2 shkurti deri më 20 gusht janë regjistruar 310,865 shkelje, prej të cilave 301,835 i përkasin tejkalimit të shpejtësisë së lejuar.

Sistemi pritet të shtrihet në periudhën në vijim, ku sipas paralajmërimeve të ministrit do të fillojë të zbatohet në zonën e Stacionit Policor të Strumicës në javën e parë të dhjetorit, për të vazhduar më pas me Shtipin dhe Manastirin, ndërkohë që synohet që mbulimi i gjithë vendit të përmbyllet deri në shkurt të vitit 2027. Ministria e Punëve të Brendshme planifikon gjithashtu të pajisë makinat e policisë me pajisje për matjen e shpejtësisë në lëvizje dhe të vendosë kamera mobile në segmentet me numër më të lartë aksidentesh me vdekje ose lëndime të rënda.

Siç raportoi Zhurma më 15 tetor 2026, sistemi i mbikqyrjes kishte regjistruar qindra shkelje gjatë dy ditëve të para në Ohër, Strugë, Kërçovë e Dibër, ndërsa autoritetet kishin paralajmëruar më parë edhe për raste të mesazheve të rreme në emër të këtij sistemi.