Tetë gra të vrara në Kosovë gjatë vitit 2026

Kosova po ballafaqohet me raste të rënda të vrasjeve të grave, ku vetëm gjatë vitit 2026 numri i viktimave ka arritur në tetë, duke shënuar rekord që nga viti 2010. Sipas të dhënave të Policisë së Kosovës të publikuara nga Radio Evropa e Lirë, nga viti 2010 deri më 26 tetor 2026 janë regjistruar gjithsej 67 gra të vrara brenda familjes, ndërsa ky vit ka tejkaluar shifrat e viteve të kaluara.

Rasti i fundit ndodhi në Vitomiricë të Pejës, ku u vra Arlinda Zekaj, ngjarje kjo që nxiti reagime dhe thirrje për përgjegjësi institucionale në mbrojtjen e grave nga dhuna. Lidhur me këtë, avokati Arianit Koci ka propozuar shpalljen e një dite zie në nderim të Arlinda Zekajt dhe tetë grave të tjera të vrara gjatë këtij viti, duke e cilësuar këtë si përgjegjësi morale të shoqërisë. «Arlinda Zekaj e meriton një ditë zie. E ne, si shoqëri, ia kemi borxh», ka shkruar ai.

Vrasjet e regjistruara përfshijnë ngjarje të rënda në rajone të ndryshme të vendit, përfshirë Dragashin, Podujevën, Malishevën, Prizrenin, Klinën dhe Gjilanin, ku viktimat kishin histori të ndryshme, mes tyre një nënë rreth 60-vjeçare, gra shtatzëna dhe raste ku viktimat kishin kërkuar më parë mbrojtje nga institucionet. Për disa nga rastet, autoritetet kanë njoftuar për arrestime, dorëzime në Polici, apo persona të dyshuar që ndodhen në arrati.