Hetimet në Itali zbardhin përmbysjen e mjetit që i mori jetën Rogert Ajdinit

Karabinierët italianë kanë nisur hetimet për të zbardhur rrethanat dhe shkaqet e përmbysjes së mjetit të rëndë për ngjeshjen e asfaltit që i mori jetën 20-vjeçarit shqiptar Rogert Ajdini në Valtopina të provincës së Peruxhias në Itali. I riu po drejtonte rulin asfaltues gjatë punimeve në rrugën Via Santa Cristina kur mjeti dyshohet se u përmbys.

Sipas autoriteteve vendore, viktima ishte banues në Trevi dhe po punonte për shtrimin e rrugës në momentin kur ndodhi ngjarja tragjike. Aksidenti fatal ndodhi gjatë kryerjes së punimeve rrugore, ku mjeti i rëndë për ngjeshjen e asfaltit e zuri poshtë të riun pasi u përmbys në rrugë.

Kolegët e punës të 20-vjeçarit kanë njoftuar menjëherë shërbimet e emergjencës për të kërkuar ndihmë mjekësore. Në vendin e ngjarjes kanë mbërritur me shpejtësi ekipe mjekësore, zjarrfikësit, ambulanca dhe një helikopter shpëtimi. Megjithatë, përpjekjet e ekipeve të emergjencës nuk arritën ta shpëtonin të riun, pasi plagët e marra nga shtypja e mjetit të rëndë rezultuan fatale.

Sipas njoftimeve nga terreni, punimet në rrugën Via Santa Cristina ishin ndërmarrë nga Bashkia e Valtopinës në kuadër të projektit për përmirësimin e infrastrukturës rrugore lokale. Kryerja e këtyre punimeve i ishte besuar një kompanie të specializuar ndërtimi, ku i riu shqiptar ishte i punësuar.

Oficerët e karabinierëve po vazhdojnë hetimet në terren për të përcaktuar me saktësi se për çfarë arsyesh u përmbys ruli asfaltues gjatë procesit të punës. Ekspertët po ekzaminojnë vendngjarjen dhe mjetin e rëndë për të sqaruar të gjithë dinamikën e aksidentit dhe për të verifikuar zbatimin e rregullave të sigurisë në punë.

Kryetari i Bashkisë së Valtopinës, Gabriele Coccia, ka shprehur ngushëllimet e tij zyrtare për familjen e të riut shqiptar. Zyrtari lokal e ka cilësuar ngjarjen e rëndë si një tragjedi të madhe që ka tronditur të gjithë komunitetin e zonës.