Stuhia lë mbi 1 milion euro dëme në Suharekë — 300 mijë vetëm në shkolla

SUHAREKË — Stuhia e fuqishme që goditi disa komuna të Kosovës shkaktoi dëme të mëdha në infrastrukturë, shkolla dhe bujqësi. Kryetari i Komunës së Suharekës, Bali Muharremaj, tha se situata tashmë është stabilizuar, por dëmet materiale janë të konsiderueshme, ndërsa dëmet totale në komunë pritet të tejkalojnë 1 milion euro.

Komuna e Suharekës ka formuar tre komisione për vlerësimin e dëmeve në arsim, bujqësi dhe shëndetësi publike. Vetëm në sektorin e arsimit llogariten rreth 300 mijë euro dëme. "Vetëm pas rreth 40 ditësh nis viti i ri shkollor dhe duhet të riparohen kulmet e dëmtuara. Nuk kemi fonde emergjente dhe do t'i drejtohemi Ministrisë së Arsimit dhe Qeverisë për mbështetje", tha Muharremaj.

Në Malishevë, shtatë shkolla janë dëmtuar nga reshjet e fundit, me dëme në fasada, çati dhe pullaze. Kryetari Ekrem Kastrati kujtoi se komuna kishte pësuar dëme të mëdha edhe nga përmbytjet e janarit, me një raport dëmesh prej rreth 642 milionë euro të miratuar në Kuvendin Komunal, por pa përgjigje nga Qeveria deri më tani.

Dëmet e fundit në Malishevë kanë prekur edhe ura, rrjetin e kanalizimit, ujërat e zeza dhe serrat e fermerëve. Sipas drejtorit ekzekutiv të Asociacionit të Komunave të Kosovës, Sazan Ibrahimi, komunat më të prekura nga stuhia janë Vitia, Mamusha, Istogu, Rahoveci dhe Suhareka.

Ibrahimi theksoi se përgjegjësia për kompensimin e dëmeve nga fatkeqësitë natyrore i takon nivelit qendror, jo komunave. "Komunat nuk kanë mjete financiare dhe as përgjegjësi ligjore për kompensimin e dëmeve. Kemi kërkuar vazhdimisht krijimin e një fondi emergjent, sepse qytetarët nuk mund të presin me vite për kompensim", deklaroi Ibrahimi.

Ai kritikoi edhe procedurat burokratike, duke theksuar se dëmet e viteve 2022 dhe 2023 ende nuk janë kompensuar, dhe propozoi krijimin e komisioneve të përbashkëta mes komunave dhe Qeverisë për të shmangur vonesat.

Drejtori për Siguri dhe Emergjenca në Komunën e Prishtinës, Fadil Fushtica, tha se kryeqyteti ka pësuar dëme më të vogla krahasuar me komunat e tjera, kryesisht materiale dhe pa pasoja të rënda, pasi ekipet komunale kishin reaguar menjëherë në terren.

Burim: Gazeta Dukagjini
— Redaksia ZHURMA