Ademi flet për interesimin e Kosovës dhe synimin te Fiorentina

Kombëtarja e Kosovës ka nisur përpjekjet për ta bindur mbrojtësin e talentuar të Fiorentinës, Arnis Ademin, që t’i bashkohet përfaqësueses, fakt ky i konfirmuar nga vetë futbollisti gjatë një interviste. Ndonëse nuk ka luajtur ende asnjë minutë, 19-vjeçari është përfshirë nga Fiorentina në listën e të ftuarve për dy ndeshjet e fundit në kampionatin italian dhe po stërvitet rregullisht me ekipin e parë pranë emrave të njohur, si ish-portieri i Manchester Unitedit, David de Gea. «Stërvitjet me skuadrën e parë zhvillohen me ritëm dhe intensitet krejtësisht të ndryshëm», u shpreh ai, duke shtuar se sezoni nuk i nisi siç kishte shpresuar për shkak të një lëndimi muskulor që ia vështirësoi përshtatjen.

Në rrugën drejt transferimit të tij, në garë kishte qenë edhe Atalanta pasi të dyja skuadrat e kishin vëzhguar në ndeshjet me Kombëtaren U19 të Zvicrës, por në verën e vitit 2025 u arrit marrëveshja për vlerën e transferimit me Young Boys, para se Fiorentina të këmbëngulte dhe ta bindte me projektin e trajnerit Paolo Vanoli. Për sa i përket së ardhmes ndërkombëtare, Ademi gjendet mes tri mundësive për të përfaqësuar Kosovën, Shqipërinë ose Zvicrën, duke theksuar se ka kaluar të gjitha grupmoshat e reja të Zvicrës përveç grumbullimit të fundit që e humbi për shkak dëmtimi. «Kam shumë respekt për Zvicrën, ku jam rritur dhe ku m’u dha mundësia të zhvillohem si futbollist, por kam edhe lidhje të veçanta emocionale me Kosovën dhe Shqipërinë, të cilat i ndiej shumë pranë», deklaroi mbrojtësi.