Si u kthye 2 korriku 1990 në ditën që tronditi regjimin komunist?

TIRANË — 2 korriku 1990 shënon rebelimin e parë masiv të shqiptarëve kundër regjimit komunist, pas më shumë se katër dekadash shtypjeje. Mijëra qytetarë u vërsulën në ambasadat perëndimore, duke kërkuar strehim dhe liri. Në ambasadën italiane hynë 870 persona, në atë franceze 500, ndërsa ambasada gjermane strehoi 3200 të tjerë.

Familjet me fëmijë u vendosën në ambiente të brendshme, ndërsa të tjerët kaluan ditë e netë në oborrin e ambasadës gjermane. Kushtet ishin të vështira: furnizimi me bukë bëhej nga jashtë, uji transportohej me autobotë, dhe rrobat laheshin në karroca. Nxehtësia e verës e bënte situatën edhe më të vështirë.

Në oborrin e ambasadës u krijua një tualet i përkohshëm, ndërsa një zyrë u shndërrua në qendër mjekësore për të trajtuar sëmundjet që shfaqeshin mes njerëzve. Sigurimi vazhdonte të vëzhgonte ngjarjet, duke i thirrur me altoparlantë të largoheshin me garanci sigurie — një ftesë që u prit me fishkëllima dhe zemërim.

Më në fund, regjimi u detyrua të lejonte largimin e tyre nga Shqipëria midis 8 dhe 12 korrikut. Shumica u transportuan me tragete në Brindisi, ndërsa disa me avionë, për t’u shpërndarë pastaj në shtetet ku kishin kërkuar strehim. Kjo ngjarje shënoi fillimin e fundit të izolimit të Shqipërisë.

Ambasada gjermane ka publikuar një kolazh me pamje emocionuese nga ato ditë, duke kujtuar momentet kur mijëra shqiptarë kërkonin shpresë dhe liri. Burim: Shqiptarja
— Redaksia ZHURMA