Si do ta shndërrojë Kosova prodhimin e robotëve ushtarakë në një industri?

PRISHTINË — Kompania Stridar Kosovo, në bashkëpunim me partnerin amerikan Stridar Inc., ka nisur prodhimin e platformës tokësore pa pilot (UGV) SideRunner, duke e prezantuar zyrtarisht më 30 qershor në Ambasadën e SHBA-së në Prishtinë.

Ceremonia u organizua në kuadër të aktiviteteve për 250-vjetorin e pavarësisë së SHBA-së, të quajtura Freedom250. Platforma SideRunner synon ta shndërrojë Kosovën në një qendër prodhimi dhe eksporti të teknologjisë ushtarake, me synim tregjet evropiane, amerikane dhe ato të Lindjes së Mesme.

Sipas kompanisë, sistemi është zhvilluar dhe përmirësuar në bazë të përvojave të njësive ukrainase dhe përdoruesve ndërkombëtarë, duke u testuar edhe me Ushtrinë e SHBA-së për të përmbushur kërkesat e misioneve moderne. SideRunner është projektuar si një platformë me përdorim të dyfishtë, e destinuar për forcat e armatosura, policinë, agjencitë e sigurisë, njësitë speciale, reagimin ndaj emergjencave dhe mbrojtjen e infrastrukturës kritike.

Para prezantimit, objektet e Stridar Kosovo u vizituan nga ministri i Mbrojtjes i Kosovës, i shoqëruar nga përfaqësues ushtarakë të Ambasadës së SHBA-së. Delegacioni u njoh me kapacitetet prodhuese të kompanisë dhe karakteristikat e platformës, ndërsa u shpreh mbështetje për zhvillimin e industrisë së mbrojtjes dhe gatishmëri për bashkëpunim të ardhshëm.

Nisja e prodhimit të SideRunner shënon një hap të rëndësishëm për industrinë e mbrojtjes në Kosovë, pasi vendi tashmë përfshihet jo vetëm në përdorimin, por edhe në projektimin dhe eksportimin e teknologjive të avancuara. Projekti pritet të rrisë kapacitetet prodhuese vendore dhe të forcojë pozitën e Kosovës në tregun ndërkombëtar të teknologjive ushtarake.

*Burim: Albinfo.ch*
*— Redaksia ZHURMA*