Pse rrezikon mbyllje shkolla shqipe e Kosturnikut?

KUMANOVË — Fëmijët shqiptarë të fshatit Kosturnik në rajonin e Kumanovës rrezikojnë të mbesin pa shkollën e tyre fillore. Ministria e Arsimit ka paralajmëruar mbylljen e institucionit, duke e arsyetuar këtë vendim me numrin e vogël të nxënësve në klasa.

Banorët janë të indignuar pasi objekti është ndërtuar vite më parë me kontributet e tyre private, pa ndihmë nga Ministria apo Komuna. Qahili Qaili, ish-kryetar i fshatit, shpjegon se shkolla shërben për nxënësit nga klasa e parë deri në të pestën, ndërsa pas kësaj të fundit, fëmijët udhëtojnë 8 kilometra deri në shkollën 'Bajram Shabani' në Kumanovë.

Prindërit kanë nisur nënshkrimin e një peticioni për të ndaluar mbylljen, duke theksuar se një fëmijë 6-vjeçar nuk mund të udhëtojë aq larg për në klasë të parë. Linda Azemi, një nga prindërit, deklaron se gjithë fshati është i një mendimi kundër këtij vendimi që prek direkt të ardhmen e fëmijëve të tyre.

Hajdin Azemi, një tjetër prind, sqaron se shkolla nuk ka pasur një rënie drastike të nxënësve, por ka funksionuar gjithmonë me një numër të kufizuar, rreth 20-23 nxënës. Sipas tij, për vitin shkollor 2027-28 pritet të regjistrohen edhe 4 nxënës të rinj, gjë që e bën mbylljen të pajustifikuar.

Valdrin Qerimi, banor i zonës, paralajmëron se ky vendim do të nxisë eksodin lokal dhe braktisjen e fshatit. Ai thekson se ekziston një kontradiktë e qartë midis Ministrisë së Bujqësisë, që stimulon jetën në fshat me subvencione, dhe Ministrisë së Arsimit që, sipas tij, po i detyron familjet të emigrojnë.

Këtij shqetësimi iu janë bashkuar edhe ish-mësimdhënësit e shkollës, të cilët kërkojnë që sakrificat e komuniteti të mos shpërfillen. Ata insistojnë se shkolla ka përmbushur misionin e saj gjatë gjithë kohës dhe nuk përbën barrë për sistemin arsimor të rajonit.

Nga Komuna e Kumanovës kanë deklaruar se nuk e mbështesin mbylljen e shkollave fillore në territorin e saj. Institucioni komunal pres dhe kërkon që Ministria e Arsimit të miratojë funksionimin e paraleleve edhe për vitin e ardhshëm shkollor, në përputhje me nevojat e banorëve të shkollës shqipe të Kosturnikut.

Burim: Euronews Albania
— Redaksia ZHURMA