Pse ZNAM-i nuk e lëshon resorin e Drejtësisë në rikonstruimin e Qeverisë?
Çfarë pengon partnerët e koalicionit të arrijnë marrëveshje për ndryshimin e ministrave?
SHKUP — Rikonstruimi i Qeverisë së Maqedonisë do të bëhet i ditur javën e ardhshme, pas seancës së Komitetit Ekzekutiv të VMRO-DPMNE-së të martën, por marrëveshja me partnerët e koalicionit ende nuk është arritur. Kryeministri Hristijan Mickoski konfirmoi se vendimet politike do të merren në nivel partiak para se të operacionalizohen në qeveri.
Partia ZNAM, e udhëhequr nga Nikola Gruevski, nuk pajtohet të lërë resorin e Drejtësisë, ku aktualisht ministër është Igor Fillkov. Memov, zëdhënës i ZNAM-it, deklaroi se bisedimet vazhdojnë dhe se të gjitha temat janë të hapura, por asnjë marrëveshje përfundimtare nuk është arritur ende.
Mickoski theksoi se të martën do të zhvillohet seanca e Komitetit Ekzekutiv, ku do të diskutohet rikonstruimi. Ai nuk zbuloi emrat e ministrave që do të ndryshohen, por sipas burimeve jozyrtare, në listë janë ministri i Shëndetësisë, Azir Aliu, dhe ai i Kulturës, Zoran Ljutkov.
Aliu deklaroi se është i vetëdijshëm se mund të jetë dita e fundit në detyrë, por theksoi se çështja është institucionale, jo personale. "Unë nuk aplikova për këtë pozicion, por institucionet duhet të vendosin se kush do të drejtojë ministrinë," tha ai. Ndërkohë, Ljutkov shprehu shpresën se negociatat do të përfundojnë deri në fund të javës.
Bashkëkryetari i VLEN-it, Bilall Kasami, deklaroi se pozicioni i partisë së tij në rikonstruim do të jetë më i mirë se deri tani. Ai konfirmoi se VLEN-i kërkon të drejtojë gjashtë ministri, duke përfshirë edhe atë të Kulturës, të cilën e kanë kërkuar hapur.
Ligji për përfaqësim të drejtë, i cili ka qenë objekt debati, u quajt "kuazi ligj" nga partitë opozitare. BDI, në qeverisjen e kaluar, kishte pranuar heqjen e balancuesit, por situata aktuale tregon se tensionet vazhdojnë.
Procesi i rikonstruimit vjen në një kontekst të tensionuar politik, ku partnerët e koalicionit duhet të balancojnë kërkesat e tyre. Deri më tani, ZNAM-i mbetet i vendosur të mos lëshë resorin e Drejtësisë, duke e bërë marrëveshjen më të vështirë.
Burim: TV21
— Redaksia ZHURMA