Shasivari: Noteria është partner i rëndësishëm në forcimin e sigurisë juridike

Ministri i Drejtësisë, Jeton Shasivari, mori pjesë në hapjen e Ditëve të Noterisë 2026, të organizuara nga Oda e Noterëve, me temë dedikuar trashëgimisë mes kornizës ligjore dhe praktikës noteriale. Gjatë fjalës së tij, ai vlerësoi se puna e noterëve ndikon drejtpërdrejt në mbrojtjen e të drejtave pronësore, marrëdhënieve familjare dhe sigurisë së transaksioneve juridike, duke e cilësuar noterinë si një nga shtyllat e sistemit juridik.

Sipas tij, ushtrimi i këtij profesioni kërkon integritet, pavarësi, etikë profesionale dhe përgjegjësi të lartë, ndërsa besimi i qytetarëve mbetet kapitali më i madh i institucioneve. Ministria e Drejtësisë do t'i kushtojë vëmendje të veçantë avancimit të legjislacionit noterial, harmonizimit me standardet bashkëkohore dhe digjitalizimit të procedurave për të siguruar kosto më të ulëta dhe qasje më të lehtë për qytetarët, në kuadër të reformave të ardhshme dhe integrimit evropian.

Shasivari shtoi se Oda e Noterëve do të jetë partner i rëndësishëm dhe i barabartë, pasi reformat e qëndrueshme kërkojnë bashkëpunim të ngushtë me profesionistët. «Siguria juridike ndërton besimin, profesionalizmi e mbron atë, ndërsa përgjegjësia e bën drejtësinë të prekshme për çdo qytetar», theksoi ai, duke uruar që kjo ngjarje të shërbejë si platformë për shkëmbim përvojash.