Syla: Emergjenca e QKUK-së ka mbetur me vetëm 18 specialistë

Shërbimet emergjente në Kosovë po përballen me mungesë të theksuar të specialistëve, ndërsa nevojiten edhe 56 mjekë të kësaj fushe, sipas drejtorit të Klinikës Emergjente në Qendrën Klinike Universitare të Kosovës (QKUK), Naser Syla. Në një intervistë dhënë për emisionin “Shëndeti Sot”, Syla ka treguar se Klinika Emergjente në QKUK ka mbetur me vetëm 18 specialistë nga 26 sa kishte më parë, të cilët tani janë të ndarë në katër ndërrime.

Sipas drejtorit të Klinikës Emergjente, situata e rënduar në shërbimet shëndetësore vjen si pasojë e largimit të stafit dhe mungesës së interesimit nga mjekët e rinj. Nga gjithsej 26 specialistë që kishte më parë kjo klinikë, tre prej tyre kanë dalë në pension, kurse pesë të tjerë e kanë lënë punën për mundësi të tjera, duke përfshirë punësimin jashtë vendit dhe në sektorin privat.

Syla ka shpjeguar se mjekësia emergjente po përballet me mungesa të theksuara edhe në shtatë spitalet rajonale, ku sipas tij ka ndërrime dhe turne gjysmake që mbeten plotësisht të pambuluara me specialistë të kësaj fushe. «Kemi problem me kuadrin e ri, që nuk janë të interesuar për lëmin e mjekësisë emergjente», ka theksuar ai gjatë intervistës.

Në lidhje me kushtet dhe sfidat e këtij specializimi, Syla ka vlerësuar se mjekësia emergjente është një lami shumë stresogjene dhe traumatike, ku kuadri është tepër i ngarkuar dhe bëhet fjalë për një fushë joprofitabile. «Nuk kemi staf është realitet që nuk kemi, është realitet që kemi problem jo veç me stafin që e kemi tani, mjekët e emergjencës, por kemi problem edhe me mjekët e rinj të cilët shumë pak prej tyre janë të interesuar që ta marrin specializim mjekësinë emergjente», ka deklaruar Syla.

Tutje, ai ka shtuar se mosha mesatare e gjeneratës së parë të specialistëve është e lartë dhe po shkon drejt plakjes. «Edhe kuadri tjetër që jemi ne, gjenerata e parë, mosha është e lartë, është mbi 50 vjeç, 54-56 është mesatarja emergjenca është ka plaket sa i përket kuadrit ndërsa nuk ka kuadër të ri janë të interesum», ka shtuar Syla.

Në këtë drejtim, drejtori ka bërë të ditur se Ministria e Shëndetësisë dhe ministri aktual kanë ndërmarrë masa për ta bërë më tërheqës këtë specializim. Këto masa përfshijnë një mbështetje financiare prej 200 eurosh shtesë për mjekët e emergjencës krahasuar me specialistët e fushave të tjera. Megjithatë, sipas tij, këto veprime ende nuk e kanë zgjidhur problemin e mungesës së kuadrove në terren.